Տաղեր

Ես էի ազատ ազգի,
Վա՜յ, աւա՜ղ, վա՜յ,
Եւ այժմ եմ այլոց գերի.
Եկայք լացէք զիս
Եւ ողբացէք զիս:

Միշտ հոգամ, զի թափեցայց,
Ճար չունիմ, ճար,
Արդ իցէ, թէ փրկեցայց.
Եկայք լացէք զիս
Եւ ողբացէք զիս:

Օտար եմ յայսմ երկրի,
Վա՜յ, աւա՜ղ, վա՜յ,
Եւ աղքատ, նաեւ այրի.
Եկայք լացէք զիս
Եւ ողբացէք զիս:

Ակն ածեմ յայս կոյս, յայն կոյս,
Ճար չունիմ, ճար,
Ապշեալ եմ ի խիստ կոծոյս.
Եկայք լացէք զիս
Եւ ողբացէք զիս:

Կողոպտեաց զիս թշնամին,
Վա՜յ, աւա՜ղ, վա՜յ,
Եւ արար կոխան ոտից.
Եկայք լացէք զիս
Եւ ողբացէք զիս:

Ոչ ոք է, որ ինձ օգնէ,
Ճար չունիմ, ճար,
Եւ Տէրն իմ զիս թողեալ է.
Եկայք լացէք զիս
Եւ ողբացէք զիս:

Պատեալ են ջուրք զիմ անձամբս,
Վա՜յ, աւա՜ղ, վա՜յ,
Պաշարեալ եմ հայեցմամբս.
Եկայք լացէք զիս
Եւ ողբացէք զիս:

Զյելս աստի յուզեմ գտանել,
Ճար չունիմ, ճար,
Բարեկամ չունիմ` յօգնել.
Եկայք լացէք զիս
Եւ ողբացէք զիս:

Զցաւս անձին չկարեմ թուել,
Վա՜յ, աւա՜ղ, վա՜յ,
Եւ այլ ոչ արտաբերել.
Եկայք լացէք զիս
Եւ ողբացէք զիս:

Տոչորիմ սրտիւ փղձկեալ,
Ճար չունիմ, ճար,
Հառաչեմ, հոգոց հանեալ.
Եկայք լացէք զիս
Եւ ողբացէք զիս:

Թէ ո՞ւստի ի յո՞ւր հասի
Վա՜յ, աւա՜ղ, վա՜յ,
Երբ յիշեմ, անձս խռովի.
Եկայք լացէք զիս
Եւ ողբացէք զիս:

Զգանգատս ես, թե ո՞ւմ յայտնեմ,
Ճար չունիմ, ճար,
Բայց եղբարցդ իմոց պատմեմ.
Եկայք լացէք զիս
Եւ ողբացէք զիս: