Տաղեր

Հայեաց եւ տես յարեւելս,
Եկեալ հասեալ քեզ պարգեւս,
Թագաւորք ընծայաբերք,
Իշխանք ծովայ եւ կղզեաց:

Նաւք են եկեալ ի Սաբայ,
Բերեալ քեզ խունկ եւ հալվայ,
Նոր պատարագ եւ ընծայ,
Ընդեր ոսկուն սոփերայ:

Նարդոս, քրքում եւ զմուռ
Եւ կինամոն հոտ անոյշ,
Ակունք` ակինթ եւ յաղութ,
Տպազիոն եւ զմրութ:

Զտաշխ եւ զկնդրուկ կասիայ,
Հերիկ ընտիր եւ մազդայ,
Քարինք յիւսեալ աղիւսեայ,
Զարմանալի շափիւղայ:

Ազնիւ կուհարն, հալվէ,
Անդրատարազ եւ նիկրէ,
Դուռն եւ դանայ ի Թարոսէ,
Հանեալ ի Բահէր ծովէ:

Ահա եկեալ են ծիծռունք,
Բերեալ են քաղցրիկ գարունք,
Դաշտաց բուսեալ են ծաղկունք,
Զանազանեալ գոյնզգոյնք:

Վարդն փթթեալ ի թվէն,
Հոտն բուրէ ի յիւրմէն,
Պուլպուլ նստէր ի յաջմէն,
Եղանակէր ձայն առ ձէն:

Ծաղկեալ շուշանն ի հովտին
Եւ համասփիւռն ի լերին,
Հարիւր աշամն եւ հազրին,
Բերեալ Հարսինդ նւիրին:

Արքայ իջեալ ի պարտէզ,
Նստեալ յաթոռ ագաթէս,
Զօրացն է լեալ ի հանդէս,
Հագնին զանազանապէս:

Եկայք ելցուք այգեստան,
Մտցուք ի նոր բուրաստան,
Եւ հովեսցուք ի շուշանս,
Անուշահոտ բուրաստանս:

Նորեն ծաղկեալ նռնենիք,
Նորաբողբոջ թզենիք,
Նոր սաղարթեալ ձիթենիք,
Արմաւ եւ նոճեւ նշենիք:

Եւ հիւսիսոյ, եկ հարաւ,
Ահա այգիս ծաղկեցաւ,
Ձայն տատրակին հնչեցաւ,
Նոր անդաստանս բերկրեցաւ:

Բղխեալ աղբիւր ի ծովէ,
Հոսեալ ի Լիբանանէ,
Գլխոց լերանց իջանէ,
Զդաշտ քո արբուցանէ:

Եկ, Հարսնուհիդ ի մայրեաց,
Երեւելով ի դաշտաց,
Խայտա ի գլխոց լերանց,
Ի վերայ խնկաբերաց:

Փեսայ բազմեալ ի գահոյս,
Մանկունք պարեն ի խնջոյս,
Զմայլին գինով անոյշ,
Եղանակեն զհաճոյս:

Դաւիթ երգէ զտասնաղին,
Ճեմէ ընդ առաջ Փեսային,
Ի մէջ նոր առագաստին,
......................................:

Զաքարիա զայս երգէ,
Հարսին աւետարանէ,
Փեսայն քո հեզ եկեալ է,
Փառօք զքեզ պսակէ:

Մանկունքս առեալ հաւասար,
Սաղմոսարան եւ քնար,
Երգեն ձայնիւ, առնեն պար,
Զաստուած օրհնեն անդադար: