Ուղերձներ

Տէր Փիլիպպոս սրբահոգի տատրակ ամբիծ,
Տի տըղայականդ չիք արատ քեզ եւ կամ ինչ բիծ։

Տեսանօղին Երեմիայի նմանիս ընտրեալ,
Տեառն շաւղաց հետեւեցար պայազատեալ։

Տառս նորոց ուխտին սրբոյ կրթականաւ,
Տեղի գըտար իմաստութեան վարժականաւ։

Տենչայի քեզ զօծումըն քո ուխտ իմ առնել,
Տեառնաշօշափ աջդ սրբասուն յաչս սըրբել։

Տուրք Աստուծոյ զքեւ փայլեցաւ արժանապէս,
Տիւ տնօրինեալ ժողովրդեան արփիապէս։

Տերեւասփիւռ տունկ պտղալից յաւէտապէս,
Տարփալի վարք ընդ սուրբ անուանդ նըմանապէս։

Տեառնականաց դու զարդարօղ պայծառափայլ,
Տաւիղ հնչեալ հռչակաւորդ առաքինեալ։

Տիրապէ՜ս ըզժողովուրդ քո տիրելով,
Տեառըն նըման զքո վիճակեալդ հովուելով։

Տնտես կանգնեալ հաւատարիմ Տեառն Աստուծոյ,
Տկարաց դեղ եւ բժիշկ հասեր ըստ Աստուծոյ։

Տեառն անուն որ՝ արդ ընկալար ի յանձըն քո,
Տիրականին շաւղացն զընթացսդ նըմանեցո՛։

Տո՛ւր ի ժամու մըշակդ զպիտոյս այրեաց 'ւ որբոց,
Տխրեցելոց ել տըկարաց տառապելոց։

Տանն Աստուծոյ վերակացու եւ գործակալ,
Տեառն եւ մարդկանց միջնորդելոյ կարգաւորեալ։

Տես թէ յո՛րքան պատուի սպասես յարքայութեան,
Տի թէ իցես ըստ օրինին մըշակութեան։

Տէրն որ ասէ Ի բաց գնացէք՝ զձեզ ոչ գիտեմ,
Տրամախոհեա՝ ըզփոխարէնն ես քեզ չասեմ։

Տէրն որ եկեալ զդուռն բախիցէ յանկարծակի,
Տալոյ զհամարն պատրաստ լիցիս յայնմ ատենի։

Տի եւ առցես զպսակ փառացըն հրաբունի,
Տարմաթուեալ ընդ երգաբանսն անճառելի։

Տեառն հաճոյ յաղօթըս քո սուրբ եւ բարի,
Տարփամ յիշել վասն Աստուծոյ՝ տէ՛րդ իմ բարի։

( Ձեռ. թիւ 1059, թղ. 53բ-54ա )