Թահմազ-ղուլի խանի (Նադիր-շահի) արշաւանքները

ԱՄԵՆԱՅՆ ՀԱՅՈՑ ԿԱԹՈՂԻԿՈՍ ՅԱԿՈԲ ՇԱՄԱԽԵՑՈՒ ՆԱՄԱԿԸ ՎՐԱՑ ԹԵՅՄՈՒՐԱԶ 2-ՐԴ ԹԱԳԱՒՈՐԻՆ (1745 թ. )

Եւ ընդ օրհնութեան նամակիս յայտնի լիցի տերութեանդ քում եւ պանծալւոյդ մերում, քանզի վասն ծովացեալ մեղաց մերոց պատահեցաւ այս ձախողակի եւ ցաւս անբուժելի Սրբոյ Աթոռոյս եւ հայրապետականի իշխանութեանս մերոյ: Եւ թէ որպէս է՝ համառօտաբար գրեալ եմք առ մերային ազգս, որք կան ի յօրհնեցելում քաղաքի քում Թիֆլիզ: Եթէ Տէրութիւնդ յոժարեսցիս գիտել՝ անտի գիտասցես: Բայց ահա աղաչանօք բազմօք խնդրեմք ի քրիստոսապսակ արքայէդ, զի որպէս լուսահոգի նախնիքն քոյ ի ժամանակս իւրեանց զսէրս եւ զխնամածութիւնս են ունեցեալ ի վերայ Աթոռոյս, նաեւ ազգիս մերոյ, եւ միշտ բարերարութիւնս եւ լաւութիւնս են արարեալ եւ ի նեղութեան ժամանակիս օգնեալ, նոյնպէս եւ դու օրհնեալ շառաւիղդ նոցունց ի գութ եւ ի սէր շարժեալ կամեսջիր եւ յօժարեսջիր առնել ի ժամանակս քո ի փառս Աստծոյն մերոյ Քրիստոսի եւ վասն սիրոյ սրբոյն Գրիգորի Լուսաւորչին մերոյ եւ սակս խաթերց հոգելոյս ծնողացն քոց եւ նախնեացն եւ մանաւանդ՝ վասն արեւշատութեանդ քո եւ Քրիստոսիւ զօրացեալ որդւոցդ:

Ժտեմք այժմ, զի որպէս մեք հանդերձ ազգիւ մերով արզ եմք արարեալ բազմայաղթ (շահին), նոյնպէս եւ պարծանքդ եւ տէրդ մեր շնորհ եւ ողորմութիւն առնելով՝ արզ արասցես նմա, ըստ պատշաճին: Գիտեմք իսկ, զի նա լուիցի քեզ՝ սակս քոյ խաթերդ կատարեսցէ զխնդիրս մեր: Այսինքն՝ զՊատրիարգն մեր, որ փոխեաց եւ զայլն կացոյց ի տեղի նորա, վերստին զԱռաջին Պատրիարգն մեր զայն կացուսցէ: Վասնզի գիտես իսկ յոգնահանճար արք այդ, զի ոչ է օրէն մեզ փոխիլ Պատրիարգի եւ թէ փոխիցի՝ պակասութիւն է հաւատոցս մերոց եւ օրինացս, եւս առաւել Սրբոյ Աթոռոյս վնաս մեծ լինի: Վասնորոյ հայցեմք ի բարեպաշտութենէդ քումմէ, զի մի զանց առնիցես, այլ ողորմեալ զխնդիրս մեր, կատարեսցես եւ լիցիս պատճառ բարեաց ի յաւիտեանս եւ զվարձս յԱստուծոյ ընկալցիս, զօրհնութիւնս եւ զշնորհս ի նեղութեան ժամանակիս Սրբոյ Աթոռոյս յօգնութիւն ժամանիցիս, Քրիստոսասէր եւ քաջամարտիկ արքայդ ի Քրիստոսաէջ Աթոռոյս ժառանգեսցես միշտ:

Ողջ լեր ի Տէր ի պարծանս մեր: Ամէն: