Տաղեր

Հիբար հողանձնէ,
Քո աշակերտէ,
Յակոբ ծառայէ:

Քեզ ողջոյն հասցէ,
Տէր, տէր Աֆէնտէ
Եւ Աստուածատրէ:

ՅԱդամայ զարմէ,
Ծննդոցն Եւայէ
Հրեշտակ ես յերկրէ:

Ի հոգւոյն շաւղէ,
Լոյս քեզ ծագեալ է,
Պետրոս ի կարգէ:

Ձեռք քո շօշափէ
Զծնեալն ի Կուսէն,
Մարմնաւոր քրոբէ:

Բերանդ աղօթէ
Եւ զՔրիստոս զենէ,
Զանցանս քաւէ:

Ոտք քո վերճեմէ,
Բարձր յերկինս կոխէ,
ԶԱստուած տեսանէ:

Յորժամ լեզուդ սկսեալ խօսակցէ,
Գորովագոյթ հայր իմ, զիս յիշէ.
Աղաչեմ:

Արեգ յարեւու,
Աստղ առաւօտու,
Հոգւոց լուսատու:

Ուռդ ի բուն որթու,
Ծառդ պտղատու,
Պտուղ տաս ժամու:

Բժիշկ դեղատու,
Ձիթով եւ գինու,
Խոցոտեալ հոգու:

Բարի տնտես դու,
Ի տանն Աստուծոյ,
Սւինդ եկեղեցւոյ:

Աղ համեմատու,
Բարեաց ձեռնտու,
Յորդորիչ բարու:

Պատրաստ ի ժամու,
Փեսային գալու
Եւ համար տալու:

Շահող մնաս դու,
Տնտես դու հաճու,
Արժան հաւատու:

Յորժամ իշխեմ ես տասն քաղաքու,
Արժան արա, Հայր, զիս յիշելու.
Աղաչեմ:

Յերից երանեալ,
Քաջ հովիւ ընտրեալ,
Քահանայ օծեալ:

Հոգւով զօրացեալ,
Իմաստիւք լցեալ,
Խրատիչ գովեալ:

ՅԱստուծոյ օրհնեալ,
Սրբոց նմանեալ,
Գործով զարդարեալ:

Մշակ աշխատեալ,
Վարձս ընկալեալ,
Յաւէտ ցնծացեալ:

Սարգիս նմանեալ,
Որդւովդ քո ծաղկեալ,
Բարեհամբաւեալ:

Առաջնորդ եղեալ,
Մանկամբք քո ընտրեալ,
Յատենի կացեալ:

Դիմօք զուարթացեալ
Եւ զայս ասացեալ.
Ահա եւ ես եւ մանկուքն իմ եկեալ:

Ի քէն հայցեմ, հայր իմ բարերար,
Յայնմ ատենի զիս մի մոռանար:
Աղաչեմ:

Րետոր իմաստուն,
Համբաւեալ անուն,
Նմանեալ առաջնոյն:

Դու ես բանիբուն
Եւ մեծ րաբուն,
Շնորհօք սուրբ հոգւոյն:

Բանաս զշրթուն,
Զլեզուդ զւարթուն,
Խօսիս քաղցրագոյն:

Պատմեն ժողովոյն,
Զպատգամ օծելոյն,
Նորոյ կտակոյն:

Զաւետիս տալոյն
Եւ խոստանելոյն,
Զկեանս անապատում:

Յոյս մեղուցելոյն,
Ջանաս դառնալոյն,
Լուծ տաս քաղցրագոյն:

Խրատիչ ծերոյն
Եւ մանկագունոյն
Եւ երից տասոյն:

Ո՛վ բարի անուն,
Քաջ հովիվ արթուն,
Մշակ նոր այգոյն:

Յորժամ ասեմ որդի օրհնելոյն,
Եկայք օրհնեալք հօր իմ բարձրելոյն,
Յայնժամ յիշեա, հայր իմ բարեգոյն,
Զիս քո ծառայդ զգրիչս փցուն.
Աղաչեմ: