Տաղեր

ՅԱստուծոյ շինեալ քաղաք պատուական,
Ցանկալի զուարթնոց եւ որդւոց մարդկան,
Զքեզ նորոգեաց Դաւիթ մեծ արքայն.
Սուրբ Երուսաղէմ, քաղաքդ աննման:

Անմահ արքային ես դու բնակարան,
Որդւոյն Աստուծոյ տեղ տնօրինութեան,
Ազինք ամենայն գալ ի քեզ ցանկան.
Սուրբ Երուսաղէմ, քաղաքդ աննման:

Կամարին երկնից համաձեւական,
Առ դիրս աստեղաց ի հաստատութեան,
Ընդ կենդանակերպսն երկոտասան.
Սուրբ Երուսաղէմ, քաղաքդ աննման:

Որդւոցն Յակոբայ տուար սեփական,
Վիճակաւ անկար տոհմին Յուդայեան,
Քեզ շինեաց տաճար Սողոմոն արքայն.
Սուրբ Երուսաղէմ, քաղաքդ աննման:

Բուրէ միշտ ի քէն հոտ անուշութեան,
Վարդի, շուշանի, խնկոց զանազան,
Կամ ազնիւ իւղոց նարդ եւ պալասան.
Սուրբ Երուսաղէմ, քաղաքդ աննման:

Քաղաք ես դու մեծ, թագաւորական,
Զոր ասաց Քրիստոս ի յԱւետարան,
Պատուէր ետ` չերդնուլ ի քո սուրբ անուան
Սուրբ Երուսաղէմ, քաղաքդ աննման:

Աստ օրհնել զԱստուած` գրոց է հրաման,
Ըստ վերնոյն Սիոնի եւ հրեշտակական,
Դու մեզ նոր Սիոն քրիստոնէութեան.
Սուրբ Երուսաղէմ, քաղաքդ աննման:

Հաճեցաւ ի քեզ Տէրն վերնական
Վէմ ընտիր եդեալ ի գլուխ անկեան,
Զի ինքն է Քրիստոս ի քեզ յարաժամ.
Սուրբ Երուսաղէմ, քաղաքդ աննման:

Աստ եղեւ հոգւոց փրկութիւն մարդկան,
Որ ի խաչ ելաւ Տէրն ի Գողգոթայն,
Յանցանքն Ադամայ, Եւայի թողան.
Սուրբ Երուսաղէմ, քաղաքդ աննման:

Նոր երկինք յերկրի հրաշազարդական,
Դու նոր արեւելք նոր արեգական,
Նորոգեալ ցնծան դասք քրիստոսական.
Սուրբ Երուսաղէմ, քաղաքդ աննման:

Առ քեզ գանձ բազում հոգեւորական,
Որ զմինն չարժէ աշխարհս ամենայն,
Նախ եւ առաջին Տեառն գերեզման.
Սուրբ Երուսաղէմ, քաղաքդ աննման:

Յոյժ ահեղագոյն հնչմամբ մեծաձայն,
Լոյսն տարածի ի սուրբ յարութեան,
Մեզ` քրիստոնէիցս, լե՛ր դու օգնական.
Սուրբ Երուսաղէմ, քաղաքդ աննման:

Ի Գեթսամանի ձորն արքունական,
Ուր Աստուածածնի դիրն է եւ տապան,
Անդ է լինելոց ահեղ դատաստան.
Սուրբ Երուսաղէմ, քաղաքդ աննման:

Ամենայն սրբոց ես դու բնակարան
Եւ մեղաւորաց մարդկան քաւարան,
Առ քեւ մտանեն ի յերկնից խորան.
Սուրբ Երուսաղէմ, քաղաքդ աննման:

Սիրտ երկրի ես դու Տեառն սիրական,
Հանգոյն աթոռոյն քերովբէական,
Ոտից Արարչին եղեր պատուանդան
Սուրբ Երուսաղէմ, քաղաքդ աննման:

Արդ չունիմ կարիք, որ քեզ է արժան,
Բարբառել բանիւք գովասանական,
Կամ տաղիւ չափել երգ ներբողական.
Սուրբ Երուսաղէմ, քաղաք աննման:

Ցնծութիւն ես դու աշխարհի համայն,
Առաւել Հայոց մեր ժողովրդեան,
Արանց եւ կանանց, ծերոց եւ մանկան.
Սուրբ Երուսաղէմ, քաղաքդ աննման:

Երեք տաճար են աստ հիացական,
Մեծին Յարութեան եւ Սուրբ Ծննդեան
Եւ սուրբն Յակոբ փառաւորական.
Սուրբ Երուսաղէմ, քաղաքդ աննման:

Արքային երկնից բարելի սեղան,
Խունկ եւ պատարագ ի քեզ վերանան,
Շնորհք Սուրբ Հոգւոյն քեւ առ մեզ միշտ գան.
Սուրբ Երուսաղէմ, քաղաքդ աննման:

Լցեալ տումարիս մեր Աբեթական,
Հազար եւ ութսուն չորս թիւ ի լման,
Յակոբէս այս քեզ երգ ընծայեցան.
Սուրբ Երուսաղէմ, քաղաքդ աննման:

Էին անեղին սուրբ Երրորդութեան,
Փառք եւ օրհնութիւն միշտ եւ յաւիտեան,
Զմեզ արժան արա քոյին տեսութեան.
Սուրբ Երուսաղէմ, քաղաքդ աննման: