Տաղեր

Աստուած օգնէ այս կնքահօրն եւ իւր սանին,
Բազում վարձ տայ հետ նոր մանկանն աշխատողին,
Գլուխ հաւատոյ նախ եւ յառաջ մկրտութիւն.
Աստուած օգնէ այս կնքահօրն եւ իւր սանին:

Դուռն բացաւ մեզ ի վերուստ տես երիկնային,
Երկնից իջաւ Հայր եւ Որդի եւ Սուրբ Հոգին,
Զարդարեցան որդիք մարդկան, ազգ երկրածին.
Աստուած օգնէ այս կնքահօրն եւ իւր սանին:

Էրէցն գայ եւ կնքահայրն ի տաճարին,
Ընդ նա ասէ` Խոստովանեա զյանցանս քոյին,
Թողու յանցանս քահանայն եւ Տէր վերին.
Աստուած օգնէ այս կնքահօրն եւ իւր սանին:

Ժողովեցան բազում ժողովք ի միասին,
Իւր դայակովն կոչէ զմանուկն ի յատենին,
Լուր գայ, բերէ զմանուկն յառաջ ժողովին.
Աստուած օգնէ մեր կնքահօրն եւ իւր սանին:

Խոնարհեալ տես կնքահայրն իւրոյ սանին,
Ծունր կրկնէ երեք անգամ յեկեղեցին,
Կամաւ բառնայ վասն Աստուծոյ զնա իւր բազկին.
Աստուած օգնէ մեր կնքահօրն եւ իւր սանին:

Հրաժարե՞ս ասե երէցն իւր վկային.
Ձայնէ ՚ւ ասէ. Դարձիր ի լոյս աստուածային,
Ղամբար փայլէ եւ հաւատայ երրորդութեան.
Աստուած օգնէ մեր կնքահօրն եւ իւր սանին:

Ճարտար մտնու յեկեղեցին ընդ քահանին,
Մերձ ի խորանն կանգնելով պատարագին,
Յայնժամ ասէ. Մերկացուցէք զհանդերձն հին.
Աստուած օգնէ մեր կնքահօրն եւ իւր սանին:

Նա քահանայն զջուրն արկանէ յաւազանին,
Շիշ եւղ օծման, պայծառ սուրբ խաչն յաջոյ ձեռին,
Որ արկանէ զմեռոնն ի ջուրն ըստ օրինին.
Աստուած օգնէ մեր կնքահօրն եւ իւր սանին:

Չիք խտիր, ասէ Պօղոս մեծն առաջին,
Պատուէր առնէ Աւետարանն մեր փրկչին,
Ջուր արկանէ երրորդ վերայ նորընծային.
Աստուած օգնէ մեր կնքահօրն եւ իւր սանին:

Ռատ բաշխէ զինչ զՅովհաննէս, էջ Սուրբ Հոգին,
Սուրբ մեռոնաւն օծանէ զտիպ պատկերին,
Վերաբերեալ երկրպագէ սուրբ սեղանին.
Աստուած օգնէ մեր կնքահօրն եւ իւր սանին:
Տանին ի տուն, զինք պաշտելով ճանապարհին,
Րամեալ մարդիկ բազում երթան առ նա բազմին,
Ցնծութեամբ տօնախմբեն շատ այր եւ կին.
Աստուած օգնէ մեր կնքահօրն եւ իւր սանին:

՚Ւ հօրով մօրով սնանի, ասեն ՚ւ ըմպեն զգինին,
Փառաց ի փառս բարձրանան եւ յորդորին,
Քեզ Մարտիրոսն զայս բան, Ղարաճասրին.
Աստուած օգնէ մեր կնքահօրն եւ իւր սանին: