Տաղեր

Այսօր զքեզ տեսայ եւ ուրախացայ,
Բարով զարդարեցայ, զՏեառնէ գոհացայ,
Գարնան ծաղկի նման, որ երեւինայ.
Այսօր զքեզ տեսայ եւ ուրախացայ:

Դրախտէն աւետաւոր ես հանց իմացայ,
Երեսդ ի վեր նայիլ սիրով կամեցայ,
Զարդարեցեր զաշխարհս ամէն զինչ որ կայ.
Այսօր զքեզ տեսայ եւ ուրախացայ:

Էկիր հազար բարով, աչօք իմ տեսայ,
Ընդ այդ քո գալստեանդ յոյժ ուրախացայ,
Թող դու բազում ապրիս յաշխարհիս վերայ.
Այսօր զքեզ տեսայ եւ ուրախացայ:

Ժամանակաց պարծանք եղեր դու հիմայ,
Ի տեսանել զերեսդ ամէն կու ցանկայ,
Լուսին ես դու բոլոր, զմեզ լուսաւորեա.
Այսօր զքեզ տեսայ եւ ուրախացայ:

Խնդամք ամենեքեան զինչ մանուկ տղայ,
Ծերունք շատ պատուականք, ընտրեալ քահանայ,
Կանայք պարկեշտաւորք, կուսանք նորընծայ.
Այսօր զքեզ տեսայ եւ ուրախացայ:

Հային աղուոր յերսդ ամէն ամիրայ,
Ձայնիւ զքեզ երանեն հազար խալիֆայ,
Ղամբար ես լուսափայլ առ մեզ լոյս ծագեա.
Այսօր զքեզ տեսայ եւ ուրախացայ:

Ճարտար ես բանաւոր, հզօր եւ արքայ,
Մարմնով դու անմարմին, հրեշտակ քեզ ցանկայ,
Յամէն երկիր բոլոր քո ձայնդ կու գայ.
Այսօր զքեզ տեսայ եւ ուրախացայ:

Նայեա առ մեզ սիրով եւ զմեզ զարդարեա,
Շրթամբք քո անուշիւք դու առ մեզ խօսեա,
Որ քո տիպ պատկերիդ է զինչ լուսինկայ.
Այսօր զքեզ տեսայ եւ ուրախացայ:

Չար թշնամին ամէն ի քէն հեռանայ,
Պատիւ քո մեծութեանդ այլ խիստ լինենայ,
Ջահիւ լուսաւորեա զամէն մերձակայ.
Այսօր զքեզ տեսայ եւ ուրախացայ:

Ռաբբի ես բանաւոր եւ մեզ հայր աբբա,
Սաղմոսիւք, օրհնութեամբ լեզուդ բարբառեա,
Վասն մեղաւորիս, որ առ քեզ եկայ.
Այսօր զքեզ տեսայ եւ ուրախացայ:

Տեսլեան քո պատկերիդ որ արժանացայ,
Րամելա ես, մեղաւորս, որ հետեւեցայ,
Ցնծայ հոգիս մարմնով եւ ուրախանայ,
Այսօր զքեզ տեսայ եւ ուրախացայ:

Ւիւանդ հոգով կայի, նայ առողջացայ,
Փառօք տեսայ զերեսդ, մեղաց մաքրեցայ,
Քեզ Մարտիրոսն եղեւ յետին նոր ցառայ.
Այսօր զքեզ տեսայ եւ ուրախացայ: