Տաղեր

Աստուած օգնէ թագաւորին,
Բաշխէ բազում կենդանութիւն,
Գիշեր ցորեկ իւր հովանին.
Աստուած օգնէ թագաւորին:

Դու թագաւոր մեզ երկրածին,
Երեսն լոյս է երկնային,
Զարդարեալ է բոլորովին.
Աստուած օգնէ թագաւորին:

Երանեցաք իւր վաճառին,
Ընդ ընկերոջն եւ կողակցին,
Թագուհին, որ զարդարեցին.
Աստուած օգնէ թագաւորին:

Ժողովեցան ազգ եւ ազինք,
Ի տեսանել նոր փեսային,
Լուսապսակ ի գլուխ եդին.
Աստուած օգնէ թագաւորին:

Խնդան ամէն իւր սիրելին,
Ծերք եւ մանկունքն, իւրեանց որդին,
Կոյս աղջկունք բոլոր հարսին.
Աստուած օգնէ նոր փեսային:

Հայր ու մայրն, եղբարք նորին,
Ձեւանան յոյժ, փառաւորին,
Ղամպար մոմեր փեսին վառին.
Աստուած օգնէ նոր փեսային:

Ճշմարտապէս նման նմին,
Մեծն Աբրահամ եւ Սառային,
Յակոբայ մեծ եւ Հռաքելին.
Աստուած օգնէ թագաւորին:

Նոր ժամանեալ Յիսուս փրկչին,
Շուրջ Գալիլեայ հարսանիքին,
Որ փոխեաց զջուրն ի գինին.
Աստուած օգնէ թագաւորին:

Չար թշնամիք քո հալածին,
Պատիւ արա կոչնականին,
Ջուր եւ գինի տուր ընծայ ամենին.
Աստուած օգնէ թագաւորին:

Ռահան, նոճի եւ մրտենին,
Սուսամ, նարկիզ եւ նռնենին,
Վարդ ու զխնծորն ընծայ բերին.
Աստուած օգնէ թագաւորին:

Տաճար մտին ընդ քահանին,
Րամեալ բազում ազգ միասին,
Ցնծան այսօր, զքեզ օրհնեցին.
Աստուած օգնէ թագաւորին:

Ւիւսին պսակ պատրաստեցին,
Փառօք փայլէա յեկեղեցին,
Քեզ Մարտիրոսն ասաց յետին,
Աստուած օրհնէ թագաւորին: