Տաղեր

Այսօր խմենք քաղցր եւ յորդոր,
Բարեկամաց ի հետ բոլոր,
Գինիս աղէկ, ճաշակն աղվոր,
Անուշ խմենք, քաղցր եւ յորդոր:

Դուք մի՛ լնուք զգաւաթն խոր
Եւ կամ դատարկ պահէք զսափոր,
Զի խմող մարդն է ծով ի խոր.
Անուշ խմենք, քաղցր եւ յորդոր:

Էրէց, տանուտէր հարգեւոր,
Ընդ հարսանիս կամ կնքաւոր,
Թող թէ կոչեն շատ կարեւոր.
Անուշ խմենք, քաղցր եւ յորդոր:

Ժողով առնեն շատ թագաւոր,
Իւր մեծամեծք ՚ւ իշխանաւոր,
Լիով խմեն շատ չափաւոր.
Անուշ խմենք, քաղցր եւ յորդոր:

Խմեն իլի մեծ փառչով նոր,
Ծունկս անկանին զինչ մեղաւոր,
Կերպ համբուրեն, տան համաւոր.
Անուշ խմենք, քաղցր եւ յորդոր:

Հաց, միս ու հաւ, տանձ ու խնձոր,
Ձայնէ` Գաւա~թ, տայ հեռաւոր,
Ղրկեն միմեանց պարգեւք` ոսկոր.
Անուշ խմենք, քաղցր եւ յորդոր:

Ճերմակ մօրուք շատ ալեւոր,
Մանուկ ընտիր եւ ձիաւոր,
Յայնժամ ամէն սէր միաւոր.
Անուշ խմենք, քաղցր եւ յորդոր:

Նա տանուտէր մարդ փառաւոր,
Շիշան ի ձեռն է ահաւոր,
Որ ինքն խմէ մարդ գլխաւոր.
Անուշ խմենք, քաղցր եւ յորդոր:

Չարէն փրկէ Տէրն երկնաւոր,
Պահէ զամէն մարդ երկրաւոր,
Ջնջեա ի մէնջ զմարդ նենգաւոր.
Անուշ խմենք, քաղցր եւ յորդոր:

Ռամ խուժադուժ կան եւ խոժոռ,
Սրտայնեղած նային խոտոր,
Վասն որոյ կան շուն թիւնաւոր.
Անուշ խմենք, քաղցր եւ յորդոր:

Տէր, տուր բարի սէր հոգեւոր,
Րամեալ մարդկան սէր բանաւոր,
Ցնծան սիրով յոյժ զօրաւոր.
Անուշ խմենք, քաղցր եւ յորդոր:

Ւիւծեալ մաշիմ գլխով ի կոր,
Փառասիրիմ մարմնով զինչ հոր,
Քեզ, Մարտիրոս, գինով խոչկոր.
Անուշ խմենք, քաղցր եւ յորդոր: