Տաղեր

Այբն ասէ. Առաքեցար հազար բարի,
Բենն ասէ. Բարի, հարիւր հազար բարի,
Գիմն ասէ. Գաւաթ խմէ իմ սիրելի,
Այբն ասէ. Առաքեցար հազար բարի:

Դան ասէ. Դու սիրելի, մեզ ըղձալի,
Եչն ասէ. Ելար ՚ւ եկիր առ մեզ հիմի,
Զան ասէ. Զմեզ սիրեցիր, յոյժ պատուելի.
Այբն ասէ. Առաքեցար հազար բարի:

Էն ասէ. Եկաք առ քեզ հոգով ի լի,
Ըթն ասէ. Ընդ քո, սիրելիդ, ուրախալի,
Թօն ասէ. Թող դուն ապրիս բազում տարի.
Այբն ասէ. Առաքեցար հազար բարի:

Ժէն ասէ. Ժամանակաց դու գովելի,
Ինին ասէ. Ի քեզ եկանք հոգով ի լի,
Լիւնն ասէ. Լոյսն երկնային ի քեզ հանգչի.
Այբն ասէ. Առաքեցար հազար բարի:

Խէն ասէ. Խմէ զկթխադ, թէ քեզ պիտի,
Ծան ասէ. Ծառայս խմէ գաւ ՚մ աւելի:
Կենն ասէ. Կարաս բանամք, բերեմք գինի.
Այբն ասէ. Առաքեցար հազար բարի:

Հոն ասէ. Հոգով զքեզ սիրել պիտի,
Ձայն ասէ. Ձայնիւ գոչեմ քեզ երանի,
Ղատն ասէ. Ղամբարն արաւ զմեզ արժանի.
Այբն ասէ. Առաքեցար հազար բարի:

Ճէն ասէ. Ճորտ ու ծառայ զանձն իմ արի,
Մենն ասէ. Մեծարեցիր զինչ որ չէի.
Յին ասէ. Յելար ՚ւ եկիր առ մեզ տեսի.
Այբն ասէ. Առաքեցար հազար բարի:

Նուն ասէ. Նոր կթխայով խմել պիտի,
Շան ասէ. Շիշան ի յիմ ձեռիս առի,
Ոն ասէ. Ով զիս սիրէ թող զմայլի.
Այբն ասէ. Առաքեցար հազար բարի:

Չան ասէ. Չար թշնամին թող խաւարի,
Պէն ասէ. Պատիւ պարտիմ իմ պարոնի,
Ջէն ասէ. Ջուր ու գինի շատ կու լինի.
Այբն ասէ. Առաքեցար հազար բարի:

Ռան ասէ. Ռաբին երէտ զքեզ ինձի,
Սէն ասէ. Սուրբ գաւաթով խմել պիտի,
Վեվն ասէ. Վեց, վեց ու վեց` մէկ հետ մէկի.
Այբն ասէ. Առաքեցար հազար բարի:

Տիւնն ասէ. Տուր ես խմեմ մէկ մի քանի,
Րէն ասէ. Րամեալ մարդկան մեծաց ազգի,
Ցօն ասէ. Ցնծամք ամէնքս յոյժ խնդալի.
Այբն ասէ. Առաքեցար հազար բարի:

Ւիւնն ասէ. Իիւրընկալար զմեզ բարի,
Փիւրն ասէ. Փառք ու պատիւ իմանալի,
Քէն ասէ. Քո ծառային Մարտիրոսի.
Այբն ասէ. Առաքեցար հազար բարի: