Տաղեր

Այբէն մինչեւ ի քէն գովեցի զքեզ,
Այբէն մինչեւ ի քէն, եղբայր մեղայ քեզ,
Արդ զայս սակաւ բանիկս գրեցի ես,
Զիարդ կաս կենցաղոյս, հարցանեմ զքեզ:

Եթէ դու զիս հարցման արժանի առնես,
Ներողութեամբ Փրկչին առողջ եմ եւ ես,
Երանի այս թղթիս, որ տեսանէ զքեզ,
Յորժամ որ ընթեռնուս, մէկ բերան յիշես:

Ահա հետ իմ եղբօրն հաշտեցայ ես,
Բազում խռովելով ոխ պահեցի ես,
Գրիգոր Վարագեցի, դու պարծալի ես,
Դու իմ աչացս լոյս եւ սիրելի ես:

Ես շատ եմ մեղուցեալ, թողութիւն առնես,
Զայսքան աւուրք խռով հետ ինձ կու պահես,
Է՛, իմ եղբայր սիրուն, զամէնն ասեմ քեզ,
Ընդ մեզ ով որ արար, զայն այլ ասեմ քեզ:

Մէկ ցեղ հետ ինձ ասաց, մէկ այլ ցեղ` հետ քեզ,
Ժամ է մեզ հաշտելոյ, ի քէն խնդրեմ ես,
Իմ բնական սիրած եղբայրն դու ես,
Լինիմ հոգւովս ուրախ աստնվորի ես:

Խնդիրք կատարէ, յերբ յԱստուած դիմես,
Ծանիր, իմ տէր եղբայր, հաշտեցայ հետ քեզ,
Կամաւ ես հաշտեցայ, զայլն դու գիտես,
Հայաստանեայց խրատիչ եւ վարդապետ ես:

Ձայնիւդ հեզաբան քաղցրազրոյց ես,
Ղեկաւար ես ճարտար, թեթեւ անցանես,
Ճշմարիտ հայոց աստուածաբան ես,
Մարգարէից նման աստուածասէր ես:

Յիմ համշիրակ եղբայր եւ սիրելի ես,
Նման ես աղաւնոյ, յոյժ միամիտ ես,
Շնորհքն աստուածային իջանէ ի քեզ,
Որ եւ երկնաւորացն յոյժ ցանկալի ես:

Չկայ մեզ օգնական, որպէս որ գիտես,
Պանդուխտ եմք եւ ղարիպ, ինչ ասեմ ես քեզ
Ջրոց նման մաքրիչ եւ այլ սրբիչ ես,
Ռետին ես քաղցրահամ, զմեզ կերակրես:

Սրբոց վարդապետադ դու հետեւող ես,
Վասն անցեալ մեղացն մեղայ ասեմ քեզ,
Տեսուչ եւ առաջնորդ հովիւ կարգեալ ես,
Րաբունի նազելի եւ երջանիկ ես:

Ցնծութիւն եւ պարծանք ժողովրդեան ես,
՚Ւ Իլովի քաղաքին քաջ դիտապետ ես,
Փառոք եւ ճոխութեամբ պայծառացեալ ես,
Քրիստոսի ողջունիւն ողջունեմ զքեզ:

Այբէն մինչեւ ի քէն Աստուած օրհնէ քեզ,
Այբէն մինչ ի քէն իմ սիրելին ես,
Եւ ի քո սրբութիւնդ առաքեցի ես,
Խնդրեմ ի յԱստուծոյ որ ողջ պահէ զքեզ:

Առաջի բնական սէրն դու յիշես,
Բայց հոգւով եմ տրտում, զի կարօտ եմ քեզ,
Որ եւ դէմ յանդիման խօսակցի ընդ քեզ,
Ի մէջ այլսեռից բնակեալ եմ ես: