Պատմութիւն

Արտաշէս երկայնաբազուկ քառասուն եւ մի ամ. առ սովաւ Եզրաս եւ Նոյեմի տակառապետ եկին յԵրուսաղէմ եւ շինեցին զպարիսպն։ Դարեհ հարճորդի ամս իննեւտասն. Արտաշէս, ամս քառասուն, առ սովաւ Իսթեր։ Արտաշէս Ոքոս, ամս չորս. Դարեհ Արշամայ, ամս վեց. զոր սպան Աղեքսանդր, եւ եկեաց ինքն այլ եւս ամս վեց. յերկրորդ ամէն Դարեհի Վշտասպեայ մինչ ՚ի մահն Աղեքսանդրի՝ լինին ամք հարիւր եօթանասուն եւ մի։ Զկնի որոյ թագաւորեաց Պտղոմէոս յԵգիպտոս, որ Լագոսեանն կոչի, ամս քառասուն. Պտղոմէոս Փիլադելփոս, ամս երեսուն եւ ութ. առ որով թարգմանեցան Հրէից գրեանն։ Պտղոմէոս Եւերգետէս, ամս քսան եւ չորս. Պտղոմէոս Փիլուպատոր, ամս քսան եւ մի. Պտղոմէոս Եպիփանէս, ամս քսան եւ երկու. Պտղոմէոս Փիլոպատովր, ամս երեսուն եւ երեք. առ որով Անտիոքոս Եպիփանէս նեղէր զՀրեայսն, որ թագաւորեաց ամս մետասան։ Անտիոքոս Եւպատոր ամս երկու. ՚ի սոյն ամի եւ ՚ի Փիլոպատոր Պտղոմեայ եօթնեւտասներորդն, ամբարձաւ Յուդա Մակաբեայ ամս երեք. եւ լինի ՚ի թագաւորութենէն Զօրաբաբելի մինչեւ ցՅուդա Մակաբեայ՝ ամք երեքհարիւր երեսուն եւ երկու։ Յուդա Մակաբեայ, ամս երեք. Յովնաթանէս, ամս տասն. Շմաւոն, ամս ինն։ Հիւրկիանոս՝ որ եւ Յոհաննէս, ամս քսան եւ վեց. Արիստաբուլոս, ամ մի. Յաննէոս, որ եւ Աղեքսանդրոս, ամս քսան եւ եօթն. Աղեքսանդրիա կինն, ամս ինն. Հիւրկանոս, ամս երեսուն եւ չորս. Հերովդէս այլազգի, ամս երեսուն եւ եօթն։ Յերեսներորդ երկրորդ ամի սորա ծնանի Քրիստոս Աստուած։ Լինի ՚ի Յուդայէ Մակաբեայ մինչեւ ՚ի ծնունդն Քրիստոսի հարիւր յիսուն եւ մի ամք. եւ ՚ի Զօրաբաբելէ մինչեւ ցՀերովդէի յերեսներորդ երկրորդ ամն, յորում Տէրն ծնաւ, չորեքհարիւր ութսուն եւ երեք ամք։ Իսկ ըստ Դանիէլի եօթներորդացն, որ ասէ եօթներորդք եօթն եւ եօթներորդք վաթսուն եւ երկու, որ լինի վաթսուն եւ ինն. եւ եօթներորդ մի, եւ կէս եօթներորդի. զմի եօթներորդն ՚ի վերայ հաշուեալ, եօթանասուն եօթներորդք է, որ լինի չորեքհարիւր իննսուն. եւ զի յայս թուոյս, որ չորեքհարիւր ութսուն եւ երեք է, մոգքն եօթն ամիս կացին թագաւորք, այն մի եօթներորդն եօթն ժամանակ է, այն չէ հաշուած, զայն ՚ի վերայ չորեքհարիւր ութսուն եւ երիցդ դիր, եւ լինի չորեքհարիւր իննսուն. զի այս միաւոր եօթնս՝ ամսօք է, իսկ կէս եօթներորդի՝ երեսուն եւ երեք տարի եւ կէսն է, յորում սպանաւ Օծեալն։ Զի այլ եօթներորդքն քառասուն եւ ինն, քառասուն եւ ինն է հաշուած, եւ այս կէս է, զի դեռ չէ ՚ի լիմն. քառասուն եւ ինն այլ կէս է, այսինքն պակաս է. զի սովոր եմք կէս ասել թերոյն։ Թէ կամիս ընկալ, թէ ոչ՝ թողութիւն շնորհեա։