Պատմութիւն

Ի վեցհարիւր երեսուն եւ երեք թուին մեռաւ Գէորգի Վրաց թագաւորն եւ ոչ գոյր նորա որդի, եւ Դեմնայն յաչաց եւ յերանաց յապաւած էր, որդին Դաւթի։ Ապա առնու զթագն դուստր նորա Թամարն, բերեալ նմա այր զորդին Ռըղոց թագաւորին զՍօսլան, որ առ զԴուին քաղաք։ Եւ ÿի գալ միւսոյ ամին մեռաւ Շահիեւարմէնն անորդի, եւ աւեր եւ սուր եւ գերութիւն բազմացաւ ՚ի վերայ աշխարհի նորա ՚ի շրջակայ ազգացն։ Եւ զի թոռն Վիդենայ՝ Շահնշահ քեռորդի տեառն Գրիգորի կաթողիկոսի առընթեր կայր մահուան շահին, առեալ զիւրսն անկանի ՚ի Սասունս. եւ անդ անկաւ ՚ի ձեռս նորա Բէկդամուրն՝ որ էր իշխան ամենայն տան շահին. առնու ՚ի նմանէ զբերդն որ Թառձեան կոչի, եւ ուխտիւ արձակեաց զնա, որ եւ ստեաց ուխտին ՚ի տիրելն իւրում աթոռոյ շահին. եւ զայն եւս եւ զամենայն Սասունք՝ եհան ՚ի նմանէ, եւ արկ ընդ հարկաւ զեկեղեցիս եւ զուխտս։

Ի վեցհարիւր երեսուն եւ չորս թուին ըմբռնեցաւ Ռուբէն ÿի բրնձէն, եւ թափեաց զնա Լեւոն եղբայրն իւր, որդին Ստեփանեայ, որդւոյ Լեւոնի, որդւոյ Կոստանդեայ, որդւոյ Ռոբենայ, որ տիրեաց եօթանասուն եւ երկու բերդից եւ զօրացաւ ՚ի վերայ Յունաց եւ Պարսից, եւ արար ընդ հարկաւ զՂլիճ ասլան սուլտանն մէջերկրեայ։

Ի վեցհարիւր երեսուն եւ հինգ թուին առին Անեցիք զԾառաքար զհայրենիս տեառն Բարսղի, յանխնայ կոտորելով զորս անդ, բաց ՚ի կանանց եւ ՚ի մանկանց։ Զոր լուեալ Ալիշէրն ամիրայն Դւնայ ճողէր զմօրուսն, եւ սեաւ զգենոյր ÿի վերայ կնոջն եւ որդեացն որ անդ, եւ ՚ի վերայ զօրացն կոտորման. եւ ՚ի քրիստոնէից փառաւորիւր սուրբ Երրորդութիւնն։