Պատմութիւն

Եւ Օգոստոս երկրորդ ինքնակալ զկնի Յուլիոսի զոր ասեն Փորահան, որ եւ Կայսր կոչեցաւ, եւ թագաւորեաց զկնի չորս հարիւր վաթսուն եւ երկու ամի խափանելոյ արքայութեանն Հռոմայ. եւ Օգոստոս եւս մեծացաւ ՚ի ծնանել մեծին Աստուծոյ եւ ամենակալ արքային. յորում աւուրս եկին մոգքն երկոտասան հազար հեծելովք, եւ լուեալ եթէ սով է ՚ի Պաղեստին, թողին զզօրսն առ Աբգար, եւ ինքեանք որ մեծք էին գնացին երկոտասան իշխանօք, եւ հազար հեծելօք. Մելքոն Պարսիկ, Գասպար Հնդիկ, Բաղտասար Արաբ. ոսկի, կնդրուկ, զմուռ ընդ ինքեանս ունելով։ Զայս գրեաց Լուկիանոս ոմն Փռանկ, որ կայր յԱսորիս, առ կայսրն Օգոստոս. Գիտասցէ ինքնակալութիւնդ քո, զի եկին ՚ի հարաւոյ արեւելից արք մեծաշուքք եւ երկրպագեցին տղայոյ միոյ ծնելոյ ՚ի Պաղեստին, հրաման առեալ ՚ի վերուստ յաստեղէ մեծէ, որ առաջնորդէր նոցա։ Իսկ ՚ի գնալ մոգուցն ընդ այլ ճանապարհս, յաշխարհն իւրեանց, կոտորեաց Հերովդէս հազար չորեք հարիւր վաթսուն եւ երկու մանկունս յերթալն Տեառն յԵգիպտոս։ Եւ Օգոստոս երթայ յԵգիպտոս, եւ սատակէ զԱնտոնինոս զօրավարն իւր, որ ապստամբեալ ՚ի նմանէ թագաւորեաց։ Եւ Աբգար շինեաց զՈւռհա, եւ անդ փոխեաց զաթոռն իւր եւ զդիւանն ՚ի Մծբնայ, որպէս Տիգրան շինեաց զՏիգրանակերտ, որ ասի Ամիթ։ Յերեսներորդ երրորդ ամի Տեառն մերոյ ծննդեանն, մեռաւ Արշաւիր թագաւորն Պարսից, թողեալ երեք որդի եւ դուստր մի, որք վիճէին ՚ի վերայ թագաւորութեանն, զորս խաղաղացոյց հաշտութեամբ Աբգար՝ անդ գնալով. զաւագ որդին Արտաշէս՝ թագաւորեցուցանէ, եւ զՍուրէն եւ զԿարէն եւ զԿոշմ քոյր նոցա՝ պատուէ Պալհաւ անուամբ, եւ ՚ի դառնալն պատահէ նմա ցաւ ուրկութեան։ Եւ եկեալ յԵդեսիա՝ առաքէ առ Մառինոս զօրավարն Հռովմայ զՄարիահա բդեշխն Աղձնեաց, եւ զՇամշագրամ նահապետն Ապահունեաց, եւ զԱնանէ հաւատարիմ իւր, զի մի՛ խորհուրդ նենգութեան կարծեսցեն զերթն նորա յարեւելս։ Եւ պատահեալ Մառինեայ յԵլեւթրապօլիս, լուան բանս բարիս եւ ելին յԵրուսաղէմ. եւ տեսին զՏէրն զի առնէր նշանս մեծամեծս, եւ հաւատացին ՚ի նա, եւ բերին զտեսեալ նշանսն Աբգարու, եւ դարձան մեծարել զնա եւ բերին զպատկերն, եւ եկաց յՈւռհա, մինչ ՚ի Նիկիփոռ թագաւորն Յունաց, որ տարաւ ՚ի Կոստանդնուպօլիս ՚ի ձեռն Աբրահամու մետրապօլտի։