Պատմութիւն

Իսկ զկնի Տրդատայ միւս այլ Տրդատ յաջորդէ զսուրբ աթոռն՝ ամս երիս. ապա Սիոն եպիսկոպոս Աղձնեաց, այր սուրբ եւ սքանչելի, որ զյորդառատ աղբիւրն ցամաքեալ առ ստորոտով Սիմն կոչեցեալ լերինն գաւազանաւ հարեալ բխեցոյց. որ եւ զկնի ութ ամի կատարի, եւ առնու զաթոռն տէր Եսայի յԵղիպատրուշոյ. զոր ասեն թէ մայրն աղքատութեամբ էր սնուցեալ, բացօթեայ, մուրով, ցրտահար ՚ի ձմերանի եւ արեւակէզ յամարանի. զոր ասեն թէ ՚ի սաստելն ոմանց ՚ի դրան հայրապետանոցին, ասաց մայրն. Ո՞չ գիտէք թէ պատրիարգ սնուցանեմ զտղայս իմ. որպէս եւ եղեւն իսկ, նախ եպիսկոպոս եւ ապա պատրիարգ, ՚ի շնորհացն Աստուծոյ. որ զկնի երեքտասան ամի կատարի. եւ յաջորդէ զաթոռն Ստեփանոս ամս երկու։ Եւ ապա Յոբ ամիսս վեց. յորում աւուրս ՚ի գեօղն Բագրեւանդ վասն ոսկեղէն զարդուց եկեղեցւոյն զրպարտեալ յոստիկանէն սպանան քառասուն այր. եւ առին յոլով գանձ։ Իսկ զկնի Յոբայ Սողոմոն յաջորդէ զաթոռն, որ էր ՚ի Գառնոյ, առաջնորդ սուրբ ուխտին Մաքենոցաց. որոյ երթեալ ՚ի գաւառն Շիրակայ ՚ի գեօղն Զրեսկ, մտեալ ՚ի խուց ճգնի յոյժ, ուստի հանեալ տանէին յաթոռն. զոր տեսեալ յոյժ ներգեւեալ ՚ի ճգնութեանցն՝ ասեն. Յո՞ երթաս. ասէ. Սեւել զերեսս դեղով ընդ այլ հայրապետսն. որպէս եւ եղեւն. զկնի ամի միոյ վախճանեալ՝ նկարի ընդ այլսն։ Եւ յաջորդէ զնա Գէորգ յԱրագածայ ոտանէ։

Իսկ յետ Աբդլայի Մահմէտ որդի նորա. եւ առաքէ առ Լեւոն երկու գրիւ մանանեխ, եւ զոր զկնի, եւ չկարաց վնասել։