Պատմութիւն

Իսկ զկնի կայսերն Յունաց Լեւոնի առնու զթագն Աղեքսանդր ամ մի. եւ յետ նորա Ռամանոս՝ ամս քսան եւ ինն։ ՅԱբասայ եւ ՚ի սորա աւուրս առաւ Մելտենի ՚ի Տաճկաց յերեքհարիւր ութսուն եւ երեք թուին, եւ յերեքհարիւր ութսուն եւ ութ՝ Համդուն ՚ի Կողոնիա եմուտ զօրօք եւ անդրէն դարձաւ։ Եւ ապա թագաւորեաց Կոստանդին որդի Լեւոնի յերեքհարիւր իննսուն եւ երկու թուին, ամս վեշտասան. որ եւ ՚ի վեցերորդ ամին էառ զՄարաշ ՚ի Տաճկաց, յերեքհարիւր իննսուն եւ ութ թուին։ Զսմանէ ասեն ՚ի միում աւուր հինգ առիւծ սպանեալ։ Սա ետ արկանել ՚ի յԱլիս գետ յոլով բեռինս Թրքաց, եւ փախոյց զզօրսն Իսմայելի, եւ կոչեցաւ Թրքաժողով։

Իսկ ՚ի սուրբ աթոռն զկնի տէր Յոհանիսի եկաց տէր Ստեփանոս ամ մի։ Տէր Թէոդորոս ամս մետասան. եւ յետ նորա տէր Եղիսէ եղբայր նորին՝ ամս հինգ. եւ զկնի նորա տէր Անանիա Մոկացի՝ ամս քսան եւ երկու։ Սա բազում աշխատութեամբ հնազանդեաց զՍիւնիք, որ Աղուանիւք թեւակոխէին, եւ ձեռնադրեաց արքեպիսկոպոս զկնի Յակոբայ ապստամբի, (զտէր Վահան ՚ի Բաղաց, որդի Ջուանշէրի իշխանին, որ շինեաց զամենապայծառ ուխտն Յոհաննու վասն, առ ստորոտս անմատոյց դղեկին Բաղաց). այլ եւ զԱղուանս ածեալ ՚ի հաւան չձեռնադրել իւրեանց կաթուղիկոս առանց աթոռոյ սրբոյն Գրիգորի։ Զկնի սորա էառ զաթոռն Վահան ՚ի Բաղաց, ամ մի. որ եւ ապա կարծիս առեալ, եթէ դաշնագիր է Վրաց, եւ պատկերս ետ ածել, վասն որոյ փոխեն զնա, եւ դնեն յաթոռն զտէր Ստեփանոս ազգական սրբոյն Մաշտոցի, որ ՚ի Սեւան, ամս երկու։