Պատմութիւն

Իսկ ՚ի չորեքհարիւր թուին փոխի սուրբ թագաւորն Աբաս. եւ առնու զթագն Աշոտ որդի նորա, Ողորմածն կոչեցեալ. որ բազում ուրկանոցս շինեաց, եւ առատ ռոճկօք դարմանէր զնոսա, յոլով անգամ եւ անձամբ սպասաւորելով նոցա, եւ զթարախածոր մնացորդս բաժակին ախորժանօք ըմպէր, կոչելով անուանս գոդեացն իշխանս եւ կիւրապաղատս, ըստ Յակոբայ՝ եթէ մեծատունք են հաւատովք։ Սա զփոքր պարիսպ քաղաքին Անւոյ շինեաց. եւ զամենայն բրգունսն եկեղեցիս յօրինեաց, ՚ի չորեքհարիւր երեքտասան թւին. եւ բարեպարիշտ կողն իւր, Խոսրովանոյշ, շինէ զփառազարդ սուրբ ուխտսն զՍանահին եւ զՀաղբատ։ Հանգեան ՚ի Քրիստոս ՚ի չորեքհարիւր քսան եւ հինգ թուին, թողլով երիս որդիս, զՍմբատ, զԳագիկ եւ զԳուրգէն. որ եւ ՚ի նմին աւուր առնու զթագն երէց որդին Սմբատ, որ Տիեզերակալ կոչեցաւ. սա զմեծանիստ պարիսպն Անւոյ շինեաց, եւ զկաթուղիկէն հիմնարկէ. եւ կրտսեր եղբայրն ժառանգէ զՏաշիր Սեւորդւովքն Ձորոյգետին. եւ զԿայեն եւ զԿայծոն, զԽորխոռունիք՝ որ ՚ի Խոռայ շինեցաւ, որ է Խոշոռնի եւ Խոռակերտ, եւ զԲազունիք՝ որ է Բազկերտ ՚ի գաւառն Տաշրայ. եւ այլ բերդք անուանիք եհաս Գուրգենայ, զոր Վիրք Սոմխէթ կոչեն։ Եւ ՚ի նմանէ սերեցան թագաւորքն Դաւիթ, Աբաս եւ Կիւրիկէ. յորոց կանայքն կրօնաւորք՝ Մամքան, եւ Ռուզուքան։ Եւ Գագիկ սակաւ ինչ կեցեալ ընդ եղբօրն, հալածական լինի վասն կարծեաց ինչ դրժանաց։ Իսկ Սմբատ հասեալ ՚ի չորեքհարիւր քսան եւ ութ թիւն՝ կատարի. եւ նոյնժամայն կոչեն զհալածեալն Գագիկ, եւ տան նմա զթագն եւ ածեն նմա ՚ի կնութիւն զԿատրամիտէ, դուստր Սահակայ Սիւնեաց թագաւորի, որ վճարեաց աւարտմամբ զկաթուղիկէն, ՚ի հրեշտակէ Աստուծոյ յորդորեալ, որ խոստանայր նմա կալ ՚ի ձեռնտուութիւն գործոյն, եւ մնալ ՚ի նմին տաճարի, մինչեւ զՔրիստոս եկեալ տեսցեն արարածք։

Իսկ զսուրբ աթոռն յաջորդէ տէր Խաչիկ ազգային տեառն Անանիայի, ամս իննեւտասն. եւ զնա փոխէ տէր Սարգիս՝ ամս քսան եւ չորս։ Սա շինեաց զվկայարան սրբոց Հռիփսիմեանցն, առընթեր կաթուղիկէին Անւոյ, եւ անդ փոխեաց զնշխարս նոցա բերեալ մեծաւ հանդիսիւ, եւ կարգեաց զօրն տօն մեծ։