Պատմութիւն

Այլ զկնի Կոստանդեայ կայսեր, առնու զթագն Լեւոն, եւ ապա Կոստանդին եւ Եռինեա մայր իւր, որ խաւարեցոյց զորդին, եւ ինքն տիրեաց ամս հինգ մեծի աթոռոյն։ Յորում աւուրս կատարեցան ՚ի Քրիստոս Սահակ եւ Յովսէփ, տաճիկք ազգաւ, յարացի հնգետասան։ Եւ զկնի Միքայէլն, եւ ապա Լեւոն, եւ յետ նորա Միքայէլ, ապա Թէոփիլոս. եւ զկնի Միքայէլ, ապա Վասիլ, եւ զկնի Լեւոն, ապա Ալեքս. եւ զկնի Ռոմանոս, որ հալածեաց զուղղափառ (!) վանորայսն յարեւելից աշխարհս. կամեցաւ ձեռնարկել եւ ՚ի վանորեայս Սեւ լերինն, յերթալն իւրում ծանր զօրու ՚ի կողմանս Հալպայ, որ եւ ՚ի բարկութենէն Տեառն հետիոտս փախեաւ միայն մազապուր։ Յետ նորա Կոսդանդին որդի Լեւոնի. ապա Ռոմանոս, եւ ապա Նիկիփոռ, ապա Կիւռ-Ժան, եւ ապա Վասիլն, ամս յիսուն եւ երկու։