Պատմութիւն

Եւ սկիզբն ÿի սրբութեանց իւրոց եւ ՚ի սրբոց արարեալ, առեալ լինէր նեղեալ ՚ի կարօտութենէ պիտոյից, եւ աւելի ՚ի ջրոյ, քարայրն վսամականին համբաւատենչ եւ արդիւնական վարդապետին Վանականն կոչեցեալ. յորում ինքն իւրայովքն ամրացեալ էր աշակերտօք եւ այլովք գաղթականօք յոլովիւք՝ ՚ի նա ապաւինելօք. որոց տուեալ զանձն փոխանակ քրիստոսաբար՝ գնայ գերի, ազատելով զնոսա, եւ ժամանակս ինչ շրջեալ ընդ բանակս խուժական ազգին վաճառի քրիստոնէիցն՝ որք ՚ի բերդն Գագայ. որք գնեցին ոչ հրէաբար ՚ի մահ նախատանաց, այլ տիրանման յազատութիւն փառաց (յիսուն դահեկանաւ, աւելի քան զՏէրն։ Այնքան ժլատ էր վաճառողն Տեառն, եւ դիւրագին եւ թեթեւ ունէր, որում ինքն էր արժանաւոր)։ Յետ որոյ կեցեալ ամս հնգետասան ՚ի փառս Աստուծոյ եւ յօգուտ բազմաց, հանգչի ՚ի Քրիստոս ՚ի բազմավաստակ ճգնութեանցն ՚ի խորանս լուսաւորչացն աշխարհի, յեօթն հարիւր թուականին, ՚ի յութեւտասն մարտի եւ ՚ի տասն յարեգի հին զուգիւն, ՚ի յաղուհացսն յաւուր շաբաթի, ՚ի յիշատակի Ովրենդի եւ եղբարցն իւր ՚ի կարգի. եւ ըստ մեզ՝ Կիւրղի Երուսաղեմի հայրապետի, առնելով տօն վերին Երուսաղեմի, որ աստէն տօնիչ եւ գգուիչ էր զաւակաց նորա, որդւոցն լուսոյ ÿի փառս փեսայի նորա, անմահ թագաւորին Յիսուսի եւ Հօր իւրում եւ Հոգւոյն սրբոյ. զհարիւրապատիկն աստէն թողեալ զանուն քաջութեան յաշակերտս իւր, եւ ՚ի գիրս գանձուց եկեղեցւոյ, զոր ամբարեաց ՚ի շնորհացն Աստուծոյ եւ ՚ի յստակ մտաց ծննդականաց։