Օրագրութիւն

Յամի ՌՃԺԳ յունվարի մէկումն Ագուլիս ես Զաքարիայ, իմ եխպայր Սիմոն այսօր Ագուլաց դուրս էլաւ, որ Մուղանու վերայ գնաց Շամախի, որ Նաջաֆղուլի խանին յետ հսաբն կտրի, զառավխանին, կամ թէ այլ:

Յունվարի զ, տրէ բ, արամ իբ, օրն չորեքշաբթի, Ագուլիս ես Զաքարիայ այսօր ջրաւրհնիք արարի Աստուծով:

Յունվարի ժումն որ թագավորի հրամանաւ սադրուն մարդ եկաւ, Հայաստանայ ամեն եկեղեցին թէ վանք գազով չափեցին, բարցրութիւն, լայնութիւն, երկայնութիւն, այսօր Ագուլաց դուրս ելան, գնացին:

Ապրիլ ժ, մէհէկի է, շամս իաումն Ագուլիս ես Զաքարիայ զատիկ այսօր Ագուլիս արարի Աստուծով:

Մայիս ժթումն ես Զաքարիայ այսօր համբարձում Մցգուն արարի, զերայ ուխտ էինք գնացել ջումիաթով:

Մայիս լա Ագուլիս Ներքի թաղի սուրբ Ովանէս անվան եկեղեցին այսօր ձեռք տվեցին, վեր կալան, որ շինեն:

Յուլիս եումն հիմն աւրհնեցին, ըսկիսպ արարին շինելոյ թագաւորի ըռաղամով, Միրզա Իբրահիմի խօսքով, զերայ Ագուլիս նորայ զաֆտումն էր:

Յամի ռճժգ յուլիս իդումն, օրն ուրբաթ, Ագուլիս որ սուրբ Թումայի առաքելոյն եպիսկոպոս Խաչատուր վարդապետն այսօր վաղճանեցաւ: Սայ ժ տարով յառաջ իւր եխպայրորդի Պետրոս վարդապետն եպիսկոպոս եր աւրհնել, դրել իւր տէղն: Պետրոս վարդապետն նստաւ սուրբ Թումայի աթոռ ըսպասաւոր: Դարցյալ, Խաչատուր վարդապետն կացաւ Թումայի ըսպասաւոր ամս լդ. ինքն էր ամաց կե. այս է: Պետրոս վարդապետն Խաչատուր վարդապետի վրայ տաշած քարով մեծ մատուռ շինեց եկեղցոյ յարաւու կողմն:

Հօքտեմբերի ժըումն ես Զաքարիայ այսօր Ագուլաց դուրս ելայ, գնացի Երեւան, թէ իմ եխպայր Սիմոնի խիզանն բերեմ Ագուլիս, խօ Աբասղուլի խանն դաստուր չտվեց:

Ես Զաքարիայ իմ եխպայր Սիմոնն վեր կայլայ. դէքտեմբերի զումն եկի Ագուլիս, որ մին բ ամիս կենայ, ել գնայ Երեւան:

Դեքտեմբերի գումն ես Զաքարիայ այս գիշեր Շարուր տեսայ, որ գիսաւոր աստղ երեւեցաւ, որ է ղոյրուղլու աստղ: Ոչ թէ միայն ես տեսայ, բօվանդակ երկիր տեսան. այսպէս շառավիղ մնաց մինչի խ օր երեւեցաւ, քիչ քիչ վարթարաւ ելաւ: