Պատմութիւն

Եւ ասեն զկնի հազար ամին ելիցն ՚ի դրախտէն, որդիքն Կայենի եդին իւրեանց թագաւոր, Սամիրոս անուն, նոյնպէս եւ որդիքն Սեթայ՝ Աղորոս անուն, որ եգիտ զթիւ կենդանակերպիցդ եւ զմոլորակացդ, եւ ՚ի նմանէ անուանեցաւ քաղդէութիւնն, որ է հմայութիւն աստեղաց. եւ անտի թուեն տասն թագաւոր, եւ ժամանակ նոցա հազար հարիւր եւ ութսուն ամ։ Ենովս հարիւր եւ իննսուն ամաց ծնանի զԿայնան. Կայնան հարիւր եւ եօթանասուն ամաց ծնանի զՄաղաղիէլ. Մաղաղիէլ հարիւր վաթսուն եւ հինգ ամաց՝ ցնանի զՅարեդ. Յարեդ հարիւր վաթսուն եւ երկու ամաց՝ ծնանի զԵնովք։ Ենովք հարիւր վաթսուն եւ հինգ ամաց՝ ծնաւ զՄաթուսաղա. Մաթուսաղա հարիւր վաթսուն եւ հինգ ամաց՝ ծնաւ զՂամէք. Ղամէք հարիւր ութսուն եւ ութ ամաց՝ ծնաւ զՆոյ. եւ լեալ եօթն հարիւր եօթանասուն եւ երեք ամաց՝ մեռաւ նախ քան զհայրն քսանեւինն ամօք։ Ի հազար վեցհարիւր վաթսուն եւ վեց ամի ելիցն Ադամայ ծնաւ Նոյ. յորում ժամանակի բազմացան չարիք, եւ յաճախեաց անիրաւութիւնն։

Զի նախ եգիտ սատանայ իւր զէն զորկորամոլութիւնն, ապա զկնասիրութիւնն, ապա զսպանութիւնն. եւ արար զայս սատանայ, զի ՚ի շատ խառնիցն լինին կանայք անծնունդք եւ կենդանիքն սպանանեն զմիմեանս, եւ բառնայ մարդկութիւն։ Քանզի քառասուն այր մեռանէր վասն միոյ կնոջ, եւ ընդ կանայսն միայն ունէին խաղաղութիւն, ասէ սուրբ հայրն Եփրեմ։ Իսկ խնամք Տեառն ընդդէմ չարին՝ զբազում խառնսն առնէր պատճառս ծնանելոյ հսկայիցն անճոռնեաց. եւ զի ՚ի կանանցն եղեւ կամաց ախտն, ՚ի ծնանել զյաղթանդամ կորիւնսն՝ մեռանէին մարքն, եւ ապրէին ծնեալքն. որ եւ աճեցեալք, եւ ՚ի կոյտս իւրեանց հասակին հայեցեալք, հպարտացեալք՝ յաւիտենից արք անուանէին զինքեանս։ Վասն որոյ զի Աստուած բազմակեաց արար զնոսա, զի փոխանակ գրոյ լինիցին զաւակացն, եւ շատս ծնանիցին, նոքա վիսացեալք բնաւ ակն ոչ ունէին մահու. զոր կարճեալ արարչին, եւ առեալ յաղտեղեալ անձանց նոցա զհոգւոյն շնորհն, ասաց՝ եղիցին տարիք դոցա հարիւր եւ քսան, եւ հոգի իմ մի՛ մնասցէ ՚ի դոսա. եւ հարիւր եւ քսան ամ՝ ոչ հասարակաց մարդկան յայնմհետէ, այլ արանց ժամանակին ներումն ապաշաւանաց։ Եւ եղեալ Նոյի հինգ հարիւր ամաց անբամբաս կենօք յանապատի բնակելով կուսութեամբ, հրամայէ Աստուած կին առնուլ, եւ որդիս ծնանել, եւ արկղ շինել՝ որ վերաբերի ջուրց։ Եւ եղեն իրքն. զհարիւր ամն ապաշխարութեան տուեալ ժամանակին. եւ զի ոչ ապաշաւեցին՝ կարճեաց զքսան ամն. զոր ասեն յիննհարիւր վաթսուն եւ երկու ամացն Մաթուսաղայի յաւելեալ եւ անցեալ ՚ի ներքոյ ջրոյն. վասն որոյ ՚ի վեցհարիւրերորդի ամին Նոյի եղեւ ջրհեղեղն, եւ կորոյս զամենայն կենդանիս, բայց յայնմանէ՝ որ ընդ Նոյի կային ÿի տապանին, ընդ ութ բանականսն։