Պատմութիւն

Յիշեսցուք համառօտիւք եւ զմերն նախնին Յաբեթ, որ զկնի ջրոյն ծնաւ զԳամիր, ուստի Գամիրք, եւ զՄագոգ, յորմէ Կեղտք եւ Գաղատացիք, եւ զՄեդա, որ զՄարս շինեաց, եւ զԹոբէլ, յորմէ Թետալք, եւ զՄոսոք որ ա՛ռ զԼիւրիկիա. եւ զԹիրաս՝ յորմէ մերն Ասքանազ եւ Թորգոմ. եւ Յաւանայ՝ Յոյնք, եւ ՚ի Թարշշայ՝ Վիրք եւ Տիւրենացիք. եւ ՚ի Կիտիմայ Հռովմայեցիք եւ Լատինացիք։ Եւ Թորգոմ ծնաւ զՀայկն, եւ զեօթն եղբարս նորա, զՔարթլոս, զԿովկաս եւ զայլսն, որք ժառանգեցին զհիւսիսի։ Եւ ՚ի Հայկայ Արամանեակ, յորմէ կոչեցաւ լեառն Արագած, եւ յԱրմանեկայ Արմայիս, որ շինեաց զԱրմաւիր։ Եւ Արմայիս ծնաւ զԱմասիա, յորմէ կոչեցաւ Մասիս լեառն. եւ Ամասիա ծնաւ զԳեղամ, որ շինեաց զԳեղարքունի. Գեղամ ծնաւ զՍիսակ, յորմէ Սիւնիք, եւ զՀարմա, որ ծնաւ զԱրամ, յորմէ ամենայն ազգ կոչէ զմեզ Արմէն։ Զի սա ընդարձակեաց զսահմանս Հայոց, որ զԿապադովկացիս եւ զՊռոտոն եւ զկլիմայն ընդ իւրեւ նուաճեալ, Արամանեակ կոչէր։ Եւ յԱրամանեկայ եւ ՚ի Պոնտոս՝ Առաջին Հայք. եւ ՚ի Պոնտոսէ ՚ի քաղաքն Մելտենի՝ Երկրորդ Հայք. եւ անտի ՚ի Ծոփաց գաւառն՝ Երրորդ Հայք. եւ անտի ՚ի քաղաքն Մարտիրոսաց եւ յԱղձնիս՝ Չորրորդ Հայք. եւ զսեփական աշխարհն իւր կոչէ Մեծ Հայք։ Սա ծնաւ զԱրայն գեղեցիկ, որ մեռաւ ՚ի Շամիրամայ, թողլով որդի զԱնուշաւան. որոց կարգի ազգն այսպէս։

Պարէտ, Արբակ, Զաւան, Փառան, Սուր յաւուրս Յեսուայ, Յոնակ, Համբակ, Առնակ, Նորայր, Վստամ, Կար, Գռակ, Հուան, Ընձակ, Գռակ, Հաւան, Զարմայր, որ յԻլիական պատերազմին ընդ Եթովպացւոց զօրուն մեռանի։ Պերճ յաւուրս Դաւթի արքային. Արբուն, Հոյն, Յուսակ, Կայպակ, զոր պսակէ Վարբակէս Մար, որ հանեալ զթագ ՚ի Սարդանապալլեայ, տիրէ Ասորեստանի եւ Նինուէի։ Առ սա եկին որդիքն Սենեքերիմայ եւ պատուեցան եւս ՚ի Պարոյրայ։ Զոր յաջորդէ Հրաչէ՝ որդի իւր, որ էր ընդ Նաբուգոդոնոսորայ յԵրուսաղէմ, եւ ած զՇամբատ ընդ իւր ՚ի Հայս, յորմէ ազգ Բագրետունեաց։ Եւ յետ Հրաչէի Փառնաւազ, Պաճոյճ, Կայինակ, Փովա, Հայկակ, Երուանդ, որ ծնաւ զմեծն Տիգրան, որ սպան զԱժդահակ, եւ զԿրիսոս ըմբռնեաց եւ արձակեաց. Բաբ, Տիրան, Վահագն, Առաւան, յորմէ Առաւեղեանք, Ներսեհ, Զարեհ, Արմոգ, Պայգամ, Վան, Վահէ, զոր սպան Աղեքսանդր Մակեդոնացին։

Իսկ ÿի Քամայ որ մնաց մեզ ասել, Քուշ, Մեստրիմ, Նեբրովթ, որ է Բէլ, Բաբ Անեբիս, Արբէլ, Քայաղ միւս Արբէլ, Նինոս այրն Շամիրամայ։