Պատմութիւն

Իսկ Եթէովպաւոցն՝ որ էին հարկատուք Եգիպտացւոցն՝ ապստամբեալ ասպատակեցին եւ գերեցին զԵգիպտոս, եւ զմայրագիրն Մովսէսի. եւ գնացեալ Մովսէս պատերազմեցաւ տասն ամ. եւ ա՛ռ զթագուհի նոցա զԹեսբաս, եւ զմայր իւր, եւ դարձաւ յԵգիսպտոս. եւ նախանձեցաւ ընդ նմա այրն Մառեայ, որ է Թերմոթիս. եւ ՚ի մեռանելն Մառեայ, թաղեաց զնա Մովսէս։ Եւ առաքեաց այր նորա զՔսանթիս չարչարիչն Իսրայելի սպանանել զՄովսէս. եւ սպան զնա Մովսէս եւ փախեաւ ՚ի Մադիամ. եւ Յանէսն եւ Յամրէս առին զորդիսն Իսրայելի եւ տարան զնոսա հնգետասան աւուր ճանապարհ ընդ անապատն, եւ շինեցին զդրախտն իւրեանց, զհնգետասան տարի. եւ ՚ի կատարման շինուածին՝ յորդւոցն Իսրայելի առին տղայս իննհարիւր եւ ութսուն, եւ զոհեցին դիւաց. եւ հաւաքեցան առ նոսա, եւ եդին պահապանս դրախտին. եւ յայնմհետէ առաւել հնազանդեցան դեւք կախարդաց. եւ չորեքհարիւր դեւք, ասեն, ոչ հնազանդեցան, մինչեւ կրկին զոհեցին յանուն նոցա, եւ ապա եկեալ առին հաւանութիւն. բայց զշւօտ ամիսն անհնազանդեալ գործեն զկամս իւրեանց տանելով զոմանս ՚ի մարդկանէ։

Իսկ Մովսէս ա՛ռ ՚ի կնութիւն զՍեփովրա դուստր Ռագուելի, որդւոյ Դադանայ, որդւոյ Յեկսանայ, յորդւոց անտի Կենդուրայ, եւ ծնաւ ՚ի նմանէ երկու որդիս։ Եւ աստ ասեն լեալ առ Դեւկալիոնիւ ջրհեղեղ ՚ի Թեսաղիա, եւ առ Փայեթոնիւ յԵթէովպիա հրայրեայցք, եւ այլ բազում ապականութիւնք ՚ի տեղիս տեղիս, որպէս պատմէ Պղատոն։ Իսկ Դեւկալիոն Պառնասացւոց կողմանցն թագաւորէր։ Մովսէս լեալ եօթանասուն ամաց՝ արժանի եղեւ երեւմանն Աստուծոյ, եւ հրամայէր գնալ յԵգիպտոս եւ հանել զԻսրայէլ. եւ նա յապաղէր զտասն ամ. եւ եղեալ ութսնամեայ, գնաց յԵգիպտոս, ՚ի չորեքհարիւրերորդի երեսներորդի ամի աւետեացն Աստուծոյ։ Յեօթանասներորդէ հինգերորդէ ամէն Աբրահամու՝ երկերիւր եւ հինգ ամ մինչ ՚ի մտանելն Յակոբայ յԵգիպտոս, եւ երկերիւր քսան եւ եօթն ամ կացին յԵգիպտոս. եւ տասն հարուածովք հարեալ Եգիպտացիքն, ստիպով հանին զորդիսն Իսրայելի յերեք հազար ութհարիւր քառասուն եւ երկու ամի ելիցն ՚ի դրախտէն. եւ ելին ՚ի հինգշաբաթոջ, եւ ՚ի կիրակէի անցին ընդ ծովն Կարմիր, եւ աստի կոչեցան Եբրայեցիք. զի Եբրայն անցիկ թարգմանի. եւ առին նոր լեզու պարգեւօք, եւ այնու երգէին զօր հնեսցուքն, եւ էր նման հայրենի լեզուին։ Եւ եօթն ամիս շարժեցաւ Եգիպտոս, եւ տապալեցան յոլով շինուածք եւ ելին արտաքս ՚ի շինուածոցն բնակիչքն։ Ի նմին ամի պարտեցաւ Ամաղէկ ՚ի Յեսուայ, եւ ՚ի նոյն ամի՝ յամսեանն երրորդի՝ ել ՚ի լեառն Սինա Մովսէս։ Ապոլիմոս իմաստասէրն եբրայեցի ասէ, եթէ նախ Մսվսէս յԱստուծոյ իմաստնացեալ գիր արար քսան եւ երկու, եւ այնու գրեաց Աստուած զտասն պատգամն, եւ ետ ցՄովսէս, եւ նովիմբ գրեաց Մովսէս նախ զԵլից գիրսն, եւ ապա զքսան եւ երկու արարածսն ՚ի Ծննդոց գիրսն եւ զայլ երիս գիրսն. եւ զօրինակ արարածոցս զգալի խորանաւն եցոյց, որ գործեցաւ եօթն ամիս ընդ եօթնօրեայ արարածոցս։ Եւ ունին հինգ գիրք Մովսէսի զրոյցս երեք հազարաց եւ եօթն հարիւր եւ երեսուն ամաց ըստ Եւսեբեայ։