Պատմութիւն

Յետ Աքազու թագաւորէ Եզեկիա. յերրորդ ամին սորա՝ եկն Սաղմանասար, եւ ա՛ռ զՍամարիա, եւ գերեաց զտասն ցեղսն, եւ տարաւ ՚ի Բաբելոն, եւ բարձաւ թագաւորութիւնն Իսրայելի, տեւեալ ամս երկերիւր եւ յիսուն. լինին յԱդամայ չորեք հազար երեք հարիւր եւ երեսուն ամք։ Րոբովամ, Նաբատ, Բայաս, Ելա, Զամբրի, Ամրի, Աքաաբ, Ոքոզիա, Յովրամ։ Յէու՝ որ սպան զՈվրամ եւ զԵզաբէլ մայր իւր, Յովաքազ, Յովազ, Րոբովամ, Զաքարիա, Սելլոմ, Մանասեմ, Փակէէ, Փակէէ, Ովսէէ վերջին։ Ի վեցերորդ ամին Եզեկիայ գերեցաւ Իսրայէլ. որ թագաւորեաց ՚ի վերայ Յուդայ ամս քսան եւ ինն։ Յիններորդ ամին սորա Հռոմելոս շինեաց զՀռոմ։ Մանասէ ամս յիսուն եւ հինգ, Ամոն՝ ամս եօթն եւ տասն. Ովսիա՝ ամս երեսուն եւ մի. Յովաքազ՝ ամիսս երեք. Եղիակիմ եղբայր նորա ամս մետասան. Յեքոնիա՝ ամիսս երեք. Սեդեկիա՝ ամս մետասան, որ գերեցաւ, եւ աւերեցաւ տաճարն։ Ամենայն ժամանակ թագաւորացն Յուդայ են չորեքհարիւր երեսուն եւ երկու ամ. եւ տեւեաց տաճարին շէն չորեքհարիւր քառասուն եւ երկու ամք։

Յութերորդ ամի թագաւորութեան իւրոյ Նաբուգոդոնոսոր տարաւ զՅեքոնիա եւ եդ ՚ի բանտի, երեսուն եւ հինգ ամ. քանզի Նաբուգոդոնոսոր որդի Նաբուպալսարայ՝ թագաւորեաց ամս քառասուն եւ երկու. յութերորդ ամին գերեաց զՅեքոնիա, եւ եդ ՚ի բանտի զամենայն ժամանակս իւր, որ է երեսուն եւ չորս ամ մնացեալն, զոր փոխեալ Իլմարովդակ զաթոռ հօր իւրոյ ամս երեք, եւ յառաջին ամին իւրոյ թագաւորութեանն եհան զԵքոնիաս ՚ի բանտէ, եւ ուտէր ՚ի սեղան արքայի։ Յետ որոյ եղբայր նորա Բաղտասար ամ մի, առ որով Դանիէլ զգիր բառնալոյ թագաւորութեանն Քաղդէացւոց ընթերցաւ, զոր էառ Դարեհ արքայն Մարաց, որ թուի թէ Աժդահակն է զի երկանուն ասեմք զնա, որ յերեսներորդ վեցերորդ ամի թագաւորութեանն իւրում ՚ի վերայ Մարաց, ա՛ռ եւ զՔաղդէացւոցն ամս երկու. եւ Կիւրոս պարսիկ սպան զնա, եւ տիրեաց Մարաց եւ Պարսից եւ Քաղդէացւոց եւ Ասորւոց ամս երեսուն։ Զոր ասեն թէ յառաջին ամին չարչարեաց զՀրեայսն եւ սպան զԱնանիանսն, եւ չարչարեաց զնա Տէր ՚ի տեսլեանն, եւ սպառնացաւ նմա. յորմէ զարհուրեալ՝ ետ հրաման արձակել զգերին Հրէից, տալով զսպասս տաճարին ցՍամանասար հանդերձապետ Յուդայ արծաթի եւ ոսկի ամանս հազար չորեքհարիւր քառասուն եւ երեք. բայց ոչ բերաւ յԵրուսաղէմ, մինչեւ ցԶօրաբաբելի գալն։ Եւ աստ լցաւ եօթանասուն ամացն վճիռն, յԵրեմիայէ ասացեալն, որ հաշուեալ լինի յութեւտասներորդ ամէն Ովսիայ արքայի, որպէս Եզեկիէլ երեսուն ամ ասէ ՚ի հինգերորդ ամի գերութեանն Յեքոնիայ, յորում սկսաւ մարգարէանալ. քանզի Յովսիա երեսուն եւ մի ամ թագաւորեաց, եւ յութեւտասներորդ ամին վճիռն հատաւ եօթանասուն ամին, չորեքտասան Ովսիայն, եւ մետասան Յովակիմայն՝ լինի քսան եւ հինգ, եւ հինգ գերութեանն՝ լինի երեսուն. եւ երեսուն եւ չորս ամ Նաբուգոդոնոսորայն, մնացեալն լինի վաթսուն եւ չորս. երեք՝ Իլմարոդայն. մի՝ Բաղդասարայն, եւ երկու Դարեհին, լինի եօթանսուն. եւ զի լցեալ էր եօթանասունն, եւ Կիւրոս յապաղէր, բարկացաւ նմա Տէր. եւ Դանիելի ասէր հրեշտակն թէ իշխանն Պարսից կռուի ընդ իս, չտալով թոյլ արձակել զգերին ըստ աղօթից քոց։ Եւ յառաջին գալն էին Հրեայքն հինգ բիւրք, որք կանգնեցին սեղան, եւ արկին հիմն տաճարին, եւ նեղեալ ՚ի շրջակայ ազգացն, մնաց անկատար մինչեւ ցԴարեհ արքայ։ Յետ Կիւրոսի Կամբիւսոս որդի նորա ամս ութ. Հրեայք Նաբուգոդոնոսոր զսա կոչեն. Մոգքն երկու եղբարք, ամիսս եօթն. Դարեհ Վշտասպ ամս երեսուն եւ վեց. Քսերքսէս Դարեհի որդի, ամս քսան եւ մի. ՚ի սորա հօրն յերկրորդ ամն Զօրաբաբէլ ել յԵրուսաղէմ, եւ շինեաց զտաճարն. առ որով լցաւ երկրորդ անգամ եօթանասունն յաւերմանէ տաճարին, երկու ամ աւելի. Նաբուգոդոնոսորի եւ որդւոցն՝ երեսուն եւ երկու, եւ երկու Դարեհ մարին, եւ երեսուն եւ ութ Կիւրոսին եւ որդւոյն, լինի եօթանասուն եւ երկու. եւ զԴարեհին երկրորդն եդեալ՝ լինի եօթանասուն եւ չորս. որ լինի աւելիքն չարութեանն եւ ծուլութեանն Հրէից, եւ ոչ Աստուծոյ քաղցրութեանն։