Պատմութիւն

Իսկ մեծն Կոստանդիանոս ունէր եւ եղբայր մի Դաղմատիոս կոչեցեալ, որոյ էին երկու որդիք, Գաղոս եւ Յուլիանոս. եւ երեք որդիս, աւագն Կոստանդ՝ անուամբ իւրոյ հօրն, որում ետ զԿոստանդնուպօլիս ՚ի կտակն՝ զոր գրեաց. եւ միջինն իւր անուամբն, որում ետ զԱնտիոք աթոռ, եւ կրտսերոյն զՀռոմ. եւ խաբեաց միջնեկն զկտակապահն, եւ առ զԿոստանդնուպօլիս, խոստովանելով պահել զաղանդն նորա, զի արիոսեան էր. եւ կալաւ աւագն զԱնտիոք, եւ չոգաւ ՚ի վերայ կրտսերոյն վասն Հռոմայ. եւ ել ընդդէմ նորա հօրեղբայրն Դաղմատիոս, եւ սպան զնա։ Եւ կրտսերն Կոստաս սպան զնա վասն եղբօրն, եւ որդիքն փախեան առ միջինն. եւ ՚ի վեցերորդ ամին Կոստասայ բռնացաւ Մագնիտիս, յափշտակեաց զԻտալիա եւ զԱփրիկէ, եւ թագ եդ ՚ի Սերմի. եւ յայն ապաստան չարք ոմանք, սպանին զԿոստաս եւ զեղբօրորդի նորա։ Եւ լուեալ միջին եղբայրն գայ սպանանէ զՄագնիտ եւ լինի ինքնակալ, եւ կարգէ զԳաղոս կեսար յԱնտաք, եւ զՅուլիանոս յուսումն առաքէ յԱթէնս. եւ զկնի այնորիկ ապստամբէ Գաղոս եւ մեռանի, եւ Յուլիանոս ապրի աղաչանօք թագուհւոյն. զոր կեսար կարգէ յարեւմտեայ կողմանն, տալով նմա զքոյր իւր զԱլինէ ՚ի կնութիւն, եւ ինքն չոգաւ յԱնտիոք։ Իսկ Յուլիանոս յաղթեալ բարբարոսացն, եւ թագ եդեալ գայ ՚ի Կոստանդնուպօլիս. եւ ելանէ ընդդէմ նորա Կոստանդիոս, առեալ մկրտութիւն ՚ի Զոյիոսէ, եւ մեռանի ՚ի մէջ Կիւլիկիոյ եւ Սորիայ. ասեն զղջացաւ մօտ ՚ի վախճանն, եւ ուղղափառ հաւատով կատարեցաւ ՚ի տէր։ Զկնի նորա Յուլիանոս, ամս երկու եւ ամիսս ութ. եւ յետ նորա Յուբիանոս, ամ մի. զոր գովէ Սոկրատ, բայց ոմանք ասեն զնա աղանդովն Արիոսի, եւ վրիժառու ուղղափառաց. վասն որոյ եւ խեղդեցաւն ասեն։ Յետ որոյ Վաղէս, ամս չորեքտասան, որ էր արիանոս։ Եւ զկնի քառասուն աւուր, եղբայր նորա Վաղենտիանոս կցորդէ նմա ամս երկոտասան, եւ մեռանի վասն ուժգին բարբառելոյն խրոխտանք ՚ի վերայ բարբարոսացն։ Իսկ Վաղէս՝ որ աքսորեաց զմերն Ներսէս, շանթահար եղեալ սատակի յԱդրիանուպօլիս հրաւիրանաւ գեհենոյն։