Պատմութիւն

Յայնմ ժամանակի նախարարքն Մօրկայ սպանին զնա, եւ եդին թագաւոր զՓովկաս, որ եւ եկեալ ՚ի Բասեն՝ ջանայր նուաճել զՀայս. եւ ընդ առաջ երթեալ Աշոտ, հարկանէ անչափ կոտորմամբ հրամանաւ Խոսրովու, եւ առնու զԿարնոյ քաղաք, եւ փոխէ զբնակիչսն յԱհմատան, տարեալ զՅոհան կաթողիկոս զկնի, որ կայր ՚ի գաղթի անդ. որ եւ անդէն վախճանեալ, բերաւ դին ՚ի գեօղն Աւան, որ կալաւ զկաթողիկոսութիւնն ամս քսան եւ վեց. եւ սուրբ պատրիարգն Աբրահամ փոխի զկնի քսան եւ երեք ամի աթոռակալութեանն. եւ յաջորդէ զնա տէր Կումիտաս, ՚ի գեղջէ Աղցից։

Իսկ յիշխանաց կարգի զկնի Մեժեժայ պարսիկք կացին. նախ Դենշապուհ, որ զշնմոլութիւնսն շատացոյց, եւ յետ նորա Վարազդատ ոմն, եւ ապա Սուրէն ազգական Խոսրովու, որ շնայր ընդ կանայս իշխանացն. ընդ որ զայրացեալ Վարդանայ՝ որդւոյ Վասակայ մամիկոնենոյ՝ սպան զնա, եւ առեալ զընտանիս իւր գնաց ՚ի Կոստանդնուպօլիս։ Բայց Հերակլ սպանեալ զՓովկաս, թագաւորեցուցանէ զորդի իւր, եւ ինքն խաղայ յարեւելս. եւ Խոռեմ աւերէ զՅոյնս հրամանաւ Խոսրովու, քինախնդիր մահուանն Մօրկայ, եւ գերէ զԵրուսաղէմ եւ զփայտն փրկական, եւ զԶաքարիա պատրիարգն Երուսաղեմի։ Յայնմ ժամանակի պատրիարգն Կումիտաս ընդարձակէ զվկայարան սրբոց Հռիփսիմեանցն, եւ պատահէ սուրբ նշխարաց նոցա. եւ լինի ոչ սակաւ մխիթարութիւն քրիստոնէից, եւ էր կնքեալ մատանեաւ սրբոյն Գրիգորի, եւ սրբոյն Սահակայ, զոր ոչ իշխեաց բանալ, այլ եւ զիւրն եդ ՚ի վերայ. եւ չափ հասակին Հռիփսիմեայ՝ տասն թիզ եւ չորս մատն, եւ զսուրբն Գրիգոր ասեն ինն թիզ, եւ զՏրդատ՝ մետասան թիզ։