Պատմութիւն

Իսկ յաղագս Վրաց թագաւորացն սկզբանց, որ կայ ՚ի գիրս նոցա, եթէ Թորգոմ ութ որդւովք եկն յԱյրարատ գաւառ զկնի ջրոյն մեծի. եւ երեք յորդւոց նորա նախագահք եղեն՝ Հայօս եւ Քարթլօս եւ Կոկասօսն, եւ տիրեցին աշխարհաց, եւ իւրեանց անուամբն կոչեցին Հայս եւ Քարթլ եւ Կովկաս. եւ տիրեցին ՚ի ծովէն Պոնտոսի մինչեւ ցծովն Կասբից՝ մինչեւ ցՄիհրան, եւ ցԱրբակ թոռն իւր, որ էառ կին ՚ի Պարթեւաց՝ Սահակդուխտ անուն ՚ի Պարտաւայ. որ եւ ամուլ գոլով հաւատաց ՚ի Քրիստոս, եւ ետ նմա զաւակ՝ զՎախտանգ, որ եւ Գուրգասարն կոչեցաւ, որ է Գայլագլուխ ՚ի Պարսից բառն. զի ունէր ՚ի վերայ սաղաւարտին պատկեր գայլոյ յառաջի կոյսն, եւ յետի կոյսն՝ առիւծու։ Սա էառ իւր ՚ի կնութիւն զդուստր Լեւոնի կայսեր. եւ ՚ի սմանէ սերեցան թագաւորք մինչեւ ցԹեւտաս, զոր կուրացոյց Աբաս. յետ որոյ թագաւորեաց Բագարատ, որդի Գուրգենայ, որդւոյ Աշոտոյ Ողորմածին, ՚ի վերայ Ափխազաց. այս ըստ Մխիթարայ երիցու ասիցն։