684 թուականի պատմութիւն

[Ի. Թուղթ Ջեւանշերի առ թագաւորն Յունաց Կոստանդին ]
       1  «Ամենայաղթ տէր, հզաւր եւ ողորմած թագաւոր Հոռոմոց Աւգոստոս Կոստանտին՝ ծովու եւ ցամաքի աստուածաբար իշխան. Ջեւանշէր ասպարապետ եւ իշխան Աղուանից հանդերձ Արեւելեացս ծառայական աշխարհաւ նուաստաբար ողջունելով երկրպագէ։
       2  Հաճոյ թուեսցի քրիստոսասէր տէրութեանդ ախորժելով ընդունել ի հեռաւոր անձանց զնորընծայ հնազանդութիւնս, զի ի մեծ վայելչութենէ փառացդ պարգեւեսցի եւ պսակաբաղձիկ խոնարհութեանս մերում աստուածաշնորհ բարերարութիւն»։
       3  Արդ իբրեւ մատուցաւ հրովարտակն առաջի ամենաբարեպաշտ կայսերն, զուարճանայր, զուարթանայր, բազմամեծար ուրախութիւն զաւրն զայն առնէր եւ իսկոյն հրամայէր գրել երդմունս եւ ունել համամիտ խաղաղութիւն։ 4  Եւ պարգեւս մեծամեծս շնորհէր եւ գահոյս արծաթիս քանդակակերտ թիկամբք ոսկեզաւծ, եւ հանդերձ ոսկեմանեալս եւ զիւրոյ անձինն մարգարտայեռն պատենիւք սուսեր։ 5  Եւ առնէ զնա պռոտոն պատրիկ եւ տայր բերել պատրկութեան եւ հիպատութեան եւ ապուհիւպաքոսութեան եւ ստրատելատութեան եւ ելիստութեան հազար երկերիւր արանց պատիւ, զի որում ինքն կամեսցի՝ շնորհեսցէ եւ նա զայն։ 6  Եւ որ ի կենեղուտ խաչէն Քրիստոսի մասն, զոր միշտ ի ծոց իւր կրէր, հանեալ յիւրմէ՝ առաքէր նմա ։