684 թուականի պատմութիւն

[ ԻԳ. Վասն ելիցն Խազրաց եւ յաղթահարելն ի Ջեւանշերէ յայնկոյս գետոյն ]
       1  Յետ այսորիկ լինելութեան եւ երկուցն հոլովելոց ամաց ելանեն Խազիրք յաշխարհս Աղուանից յառ եւ յաւար։ 2  Յայնժամ իշխանին Աղուանից զինեալ զինքն՝ մտանէ առաջի ամենայաղթ նշանին եւ, կացեալ ի վերայ ծնգաց իւրոց՝ զարքային Իսրայեղի երգէ երգս, եթէ՝ «Տէ՛ր իմ, առ զզէն եւ զասպար քո եւ արգել զեկեալսն ի վերայ իմ»։ 3  Եւ առեալ զգունդն իւր՝ անց յայնկոյս գետոյն մեծի Կուրայ եւ ետ ընդ նոսա պատերազմ։ 4  Եւ ոչ վրիպեցաւ ի խնդրոյն, զի ի խռնել պատերազմին, գթեալ քաջասնոյց նորայն երիվարն՝ գլորեցոյց զնա, սակայն ոչ կործանեցաւ, զի Տէր ետ ձեռն եւ կանգնեաց զնա, որ յառնելն եհար զընդդիմամարտն։ 5  Եւ զայն աւր եւս արար յաղթութիւն մեծապէս՝ ասելով առ բարբարոսն այն ազգ. «Գնա՛, մո՛ւտ ընդ դուռն Չորա, եւ մի եւս յաւելոյր գալ այսր, զի արգել Տէր զյառնելն քո »։