684 թուականի պատմութիւն

[ ԻԴ. Կատարումն տաճարին Տեառն ի բերդն Գարդման եւ նաւակատիքն ի Ջեւանշերէ, եւ աւրհնաբանումն նորին եւ կանգնիլն ի նմա խաչին Քրիստոսի]
       1  Ի յաղթահարելն Ջեւանշերի եւ երկուց ամաց անցելոց զկնի վանելոյն զզաւրսն Խազրաց կատարի գեղեցկայարմար շինումն տաճարին անուան Աստուծոյ։ 2  Եւ նորա յարուցեալ անկանի առաջի մշտնջենաւոր լուսոյն՝ կալով յաղաւթս. 3  «Այժմ արի՛, Տէ՛ր, ի հանգիստ քո, զոր շինեցի անուան քո, եւ ի յարկ քո կենեղուտ փայտիս»։
       4  Յայնժամ առնու զկաթողիկոսն հանդերձ եպիսկոպոսաւքն եւ ամենայն նախարարաւքն իւրովք, ելանէ իբրեւ աւուր միոյ ճանապարհ ի վեր կոյս Փերոժ Քաւատ քաղաքի ։ 5  Անկեալ աղաւթէր նախ ի վանս մի, զոր շինեալ էր յանշէն վայրս ի մէջ երկուց գաւառաց, ամենալի բարոյիւք, ի հանգստի իջեւանի իւրոյ ։ 6  Եւ ամենայն եկելոց անդր եւ հրամանս ի վերայ կարգեալ, թէ մի՛ եւս լիցի անընդունելի ումեք ի ձէնջ մնալ։
       7  Եւ անտի յարուցեալ բազմախումբ կաճառաւն՝ մտանէ ի Գարդման գաւառ։ 8  Եւ որ աւր տասն եւ մի էր արաց ամսոյ, զխաչն լուսոյ տարեալ հանգուցանէ ի տանն, զոր շինեաց։ 9  Եւ անդ կացեալ ի վերայ ծնգաց իւրոց՝ թախծալից զղջմամբ եւ արտասուաւք դնէր աղերս ամենահաստիչ Փրկչին եւ ասէր.