Ամարանոց Բիւզանդեան

 

588

Պանծալիդ Եօրուս` բերդ բարձրածայրին,

անշուք ինձ ցուցար` ՚ի տարակային,

բայց յորժամ ՚ի քոյդ` շրջեցայ տեղին,

մեծաշուք ցուցար` քան ըզքաղաքին:

 

589

Այն բարձըր շինուած` քում միջնաբերդին,

¹ այն պարիսպ բերդին` ՚ի զառ ՚ի վայրին,

անտի մինչ ՚ի ծով` պարիսպ քաղաքին,

ահեղ տեսութեամբ` զիս զարմացուցին:

 

590

Տեսի ընդ որմունս` քում միջնաբերդին,

ներքոյ արտաքոյ` ըզնըշան խանին,

յորմէ գիտացի` զդար ժամանակին,

քում նորոգութեան` յետ մերոյ փրկչին:

 

591

Քըսան եւ հինգ տունք` տաճկաց ՚ի բերդին,

եւ քսան զինուորք` պահնակք ՚ի նըմին,

անտառ թըզենւոյ` սահման քաղաքին,

փակեալ եւ անյայտ` վայր միջնաբերդին:

 

592

Գաւագ իւր աւան` ՚ի ներքոյ նորին,

բընակեալ տաճկաց` հազարաց անձին

² սահմանագըլուխ` գոլով նեղուցին,

հարկ է հանդիպել` նաւուց Պոնտոսին:

 

593

Բազմօք հընացեալ` ցուցար յիմ անձին,

յորժամ քոյդ ծագման` հասի հանդիսին,

Որիոնին այն` անուամբ Դիոսին,

պանծաս առ նախնիս` դիցապաշտ ազգին:

 

595

Եէրօս սրբազան` ըզքեզ կոչեցին,

³ յաղագս տաճարի` նորին Դիոսին,

զոր ՚ի Եօռօզ ձայն` յեղափոխեցին,

փոփոխիչք հընոյն` խուժագուժք ռամկին:

 

596

Որոյ գեղեցիկ` քանդակ արձանին,

կանգնեալ կայր անդէն` ըստ Կիկերոնին,

հայր հողմոց կարծեալ` հեթանոս ազգին,

առ յաջող ելից` աստէն զոհէին,

 

597

Նախկին Փըրիքսոս` յիւր ճանապարհին,

որդի Նեփելեայ` եւ Աթամանտին,

շինեաց զայս մեհեան` եւ զաշտից տեղին,

երկոտասան դից` վայր զոհարանին:

 

598

Ուր եւ զոհս մատոյց` յետ իւրում դարձին,

առ ՚ի սահմանաց` կողքիսեան երկրին,

օրինակ առեալ` նաւուց Պոնտոսին,

յերթեւեկ իւրեանց` աստէն զոհէին:

 

599

Արգոնաւաստիք` ընկերք Յասոնին,

ոսկեթել գեղման` առօղք յաւարին,

՚ի գընալ իւրեանց` նաեւ ՚ի դարձին,

ըստ սովորութեան նուէրս ձօնեցին:

 

600

Այսպէս ակնարկեն` պատգամք հընագրին,

Երոդոտոսին` եւ Ապողոնին,

յայս միաբանին` եւ կարծիք նոցին,

Դիոդորոսին` Դեմոսթենէսին:

 

 

601

Քաղկեդոնացիք` տիրել խնդրէին,

իբրեւ ժառանգորդք` սորին ամրոցին,

այլ բիւզանդացիք` տիրապետեցին,

զօրագոյն գոլով` ՚ի հանդէս ծովին:

 

 

602

⁴ Մինչեւ ըզկընի` գընոց գընեցին,

՚ի կաղիմեդեայ` Սելեւկեանց պետին,

իսկ Պրուսիաս` արքայ Պուռսային,

էառ գըրաւեաց` ՚ի ձեռաց նոցին:

 

603

Յետ ժամանակաց` դարձոյց վերստին,

զայս Եէրօն աւան` Եօրուս ըստ տաճկին,

եւ ըզկարասիս` որ յիւրում բերդին,

ըստ վըկայելոյ` Պոլիբիոսին:

 

604

Ուր բիւզանդացիք` տիրօղք ամրոցին,

՚ի խափան անցից` թշնամեաց նաւին,

ամբարտակ կանգենեալ` ՚ի ծովեզերին,

կողմանէ ՚ի կողմ` շղթայ ձըգէին: