ՄՍՔԻՆ ԵՐԷՑ

Բ/Խ. ՏԱՂ Ի ՎԵՐԱՅ ԳԻՆՈՅ

* * *

Աս աստըւորիս վերայ

Երկու բան՝ ողորմ ու լալի,

Մէկ մ' օր գինէսէր լինի,

Մէկ մ' ալ այն մեղօք մեռանի,

Մարդն, որ գինէսէր լինի,

Թող չասէ, թէ՝ Ես եմ կենդանի,

Կարգն մեռելի նստի

'Ւ աղքատացն, որ փող մի չունի:

 

* * *

Գինին շատ մեղաց մէրան,

Շատ չարիք յիւրմէ ծնանի,

Գինին ջրհեղեղն եբեր

Եւ չեթող զայլ ոք կենդանի,

Շատ ազգի-ազգի չարիք,

Որ յիշեն՝ ասել չի պիտի,

Շատ ոք դէմ սըրին տանի,

Շատք ի պատն ի վար անկանի:

 

* * *

Շատ ոք կայ՝ կռիւ կանէ,

Շատ կայ, որ ապրանք յագահի,

Շատ ոք ի խելաց տանի,

Շատ գիտուն՝ անգէտ մեռանի,

Զընցեղ ապրանքն յէ՞ր սիրէք,

Որ զմարդն ի խելաց կու տանի,

Զոտւին ծուռ ու մուռ դնէ,

Ի վերայ տղմին կու պառկի:

 

* * *

Փսխէ ու ապայկանի,

Փորոտին գայ բերնէն թափի,

Զերեսն ի վերան դնէ,

Ա՜յ գերի, հալտ ո՞նց կու լինի,

Քացախն ի գինուն լինի,

Որ կեռայ առանց կրակի,

Ծնի ու որդիք բերէ,

Ա՜յ, վա՜յ, թէ ինչ խոր կու խօսի:

 

* * *

Քահանայն զան է՞ր խմէ,

Աստուծոյ տեղըն կու կանգնի,

Զոսկին տան պղինծ առնուն,

Յէ՞ր խառնէ շաքարն ի լեղի,

Կասէ, թէ «Բաժակ է այս,

Բաժակիս այս խմել պիտի»:

Հեռի ու հազար, իմ Տէր,

Բաժակն ի այս ինչ նմանի:

 

* * *

Բաժակն խորհուրդ ունի,

Մեռելին կու տան նայ այրի,

Լուսըն մըթան ի՜նչ նման

Կամ խաւարն անշէջ ճրագի,

Ըզճառն ի առջեւտ առնուս,

Կարդաս, տե՛ս, ինչ կու խօսի,

Ականճ դընես, յուշ լինաս,

Յոր ականջդ ի վեր չանցանի:

 

* * *

Երթաս եւ խմես գինի,

Զայն գործես զինչ որ քեզ պիտի,

Մսքին էրէցն մեղքըտ լաց,

Ատ բանէտ քեզ ինչ կու պիտի:

 

ՊՈՒՆԻԱԹ ՍԵԲԱՍՏԱՑԻ

Բ/ԽԱ.

* * *

Հիւնդին Աստուած է դեղ,

Որ մահու է տէր եւ կենաց,

Զհէքիմն սէպէպ ասեն,

Խելօքաց է բանս ասացած,

Թէ զՃալինոսն ասեն

Եւ զԼոխման՝ բազմաց վկայած,

Հրամանն ի վերուստ պիտի,

Որ օգնէ բժիշկըն գոված:

 

ՅԱԿՈԲ ԹՈԽԱԹԵՑԻ

Բ/ԽԲ. ԹԽՏԻ ԵՐԵՍ ԳՐԷ

Նամա՛կ, ես քեզի կասեմ՝

Չը յասեմ, շուտով հասանես,

Երթաս՝ տեառն իմոյ ձեռին

'Ւ իմ բերնովս զաջըն համբուրես,

Իմ տեղն զըրոյց անես,

Զիմ սրտին խորհուրդըն յայտնես,

Միթէ ինք գթած լինի

Եւ չառնէ ըզբանըս անտես:

 

Բ/ԽԳ.

* * *

Դաւիթ մարգարէն հրամեց,

Թէ՝ Չարկամ ունիս, նայ սիրէ,

Ի ձեռն առ ի տունըդ տար,

Աստուծոյ բարովն պատուէ,

Գաւաթ լից, ի ձեռն դիր,

Իր լեզվովն ինք զինք անիծէ,

Աստուած զայս տունս շէն պահէ

Զքո չարկամն գլխիվարէ:

 

Բ/ԽԴ.

* * *

Անէծ զՔանան մանուկ՝

Լիրբ յերես մարմնով սատանան,

Ասաց թէ՝ «Ծառա՛ լինիս

Եղբայրց քոց մինչեւ յաւիտեան»,

Յերկիւղի իր լսի

'Ւ աշխարհս ապաշխարհութեան,

Ով ոք ամօթ 'ւ երկիւղի կենա,

Աներկիւղ նմա յաւիտեան:

 

Բ/ԽԵ. ՏԱՂ ՀՈԳՈՅ

* * *

Յաշխարհս ես ի ժուռ եկի,

Զիմ մեղաց տունն շինեցի,

Քարիկ մի ի վեր կալի,

Իմ հոգոյն համար չդըրի,

Ելա, ժողվեցի զմեղկունքս,

Ի յառջիս դըրի ու լացի,

Յանտէնն յլ ղաֆիլ կերթան,

Շալկեցի ու հետ գընացի,

Հրեշտակն այլ ի դէմ դիպաւ,

— Յո՞ւր կերթաս, ողորմ ու լալի,

Զատ շալկիկդ, որ դուն ունիս,

Նա յանտէնըն տեղ չգըտւի,

Կապած է մազէ կարմունճ

'Ւ ի ներքեւըն հուր կու վառի,

Յուր արդարքն թըռչին 'ւ անցնին,

Մեղաւորքն ի հուրն անկանին:

 

* * *

Եկին ու խապար բերին,

Թէ մազէ կարմունջ կապեցին,

Արդարքն ի խընդալ առին,

Մեղաւորքըն նըստան լացին,

Զայս մեղկունքս որ մենք ունիմք,

Թէ տախտակ կապեն՝ չանցանիմք,

Թէ քարէ կարմունճ կապեն,

Գըլօրիմք 'ւ ի հուրն անկանիմք:

 

* * *

Արդար դատաւորն Աստուած

Ի յերկնից ի վայր իջանէ,

Արդար դատաստան դընէ,

Զմեղաւորքն յարդար ջոկէ,

Արդարոցն «Եկէ՛ք» ասէ,

Զմեղաւորքն ի հուրն առաքէ,

Արդարքն ի ցընծեալառնուն,

Մեղաւորքն ամ ի՞նչ տի անէ:

 

* * *

Կանչեմ հօտ ի վեր, Իմ Տէ՛ր,

Զիս ի յիմ մեղացն ազատէ,

Մեր Տէրն հրամայեց բերնովն,

Թէ՝ Անոր ճարակն ի քէնէ,

Զինչ շաբթուն ի բուն գործես՝

Կիրակի զայն խոստովանէ,

Հաքցընեմ քեզ հանց շապիք,

Որ յանտէն հուրն ըզքեզ չերէ:

 

Բ/ԽԶ.

* * *

Եղբա՛յրք, շտ բարեւ լալով,

Թ' յաշխարհին ո՞նց կայք դուք բարով,

Ժամանակս էրեկ 'ւ անցաւ,

Ի միմիանց ենք մեք կարօտով,

Մարմինս շաղախեալ տղմով,

Սեւացեր հոգիս չար մեղով,

Ճարակն Տեառնէ լինի՝

Բժշկի հոգիս սուրբ դեղով:

 

* * *

Գերիս արբեցեր մեղով,

Զօրն ի ժուռ կու գամքան զգինով,

Մադա՜թ, դեղ արէք փութով,

Չէ՝ կորի՛ մարմինս հոգով,

Զինչ նաւն ի ծովու միջին

Ղարղ եղնի յանկարծ նայ քամով,

Այսպէս իմացիր դու զիս,

Յեղբօրէ կամ խիստ կարօտով:

 

* * *

Գինին ի գըլխէս թափաւ,

Սեւերես եղէ 'ւ ամօթով,

Այլ չար չիմացաւ գերիս,

Զօրն ի բուն ի ժուռ գամ լալով,

Յիմարս յաղթեցաւ մեղով,

Ու հոգիս հարաւ սըլաքով,

Հարամկին ընկեր եղայ,

Նայ տ'այրիմ անանց կըրակով:

 

* * *

Այս սուտ 'ւ անցաւոր աշխարհս

Շաղախեաց ըզիս տըղմով,

Զինչ հիմն ի վերայ հողին

Ողողեց գարնան հեղեղով,

Տարաւ ի յանդունդ իջուց

Ու փակեաց անտաշ քարերով,

Ես յոյժ յարարիչն ունիմ

Խալըսէ նայ ըզիս փութով:

 

* * *

Ըսպիտակն ալիքս անկաւ,

Կտրեցաւ սիրտըս մեկհետով,

Զինչ ճիւղն ի ծառին շարժի,

Ու թափի ղազալն իւր կամով

Չորացեալ խըռիւ դարձայ,

Որ ժողւի նայ աշնան քամով,

Այս կենքս նանիր 'ւ ունայն,

Ցընորեր եմ ես շատ լալով:

 

* * *

Հրաման յԱստուծոյ լինի՝

Ինձ դարձ տայ իւր սըրտիւ կամով,

Դարձեր եմ լեղի կարաս,

խոցոտար մարմինս շարաւով,

Այլ բան չի գիտեմ գերիս,

Քան զԴաւթեան առածն ասելով,

Զիւր արեամբ գընացեալ ծառայս

Յատենին չառնէ ամօթով:

 

Բ/ԽԷ.

* * *

Հայր մեր, որ յերկինս ես դու,

Բարձրութիւնն ընդ քեզ վայել է,

Անուն քո սուրբ եղիցի,

Առաքեալ է բանն ի Հօրէ,

Քան զԱհարոնի գլուխն,

Որ ծաղկեալն իւղովն օծեալ է,

Քան զԱհերմոն լի,

Ի Սինեա քաղցրիկ ցողեր է,

Քան զհամասփիւռ ծաղիկ,

Ի Սուկաւ լեառն բուսեր է,

Ոչ զգարունն ջուր կուզէր,

Ոչ ամառն թօռմելւո է,

Հանցեղ ծաղիկ ո՞վ տեսեր է,

Զարարածս ի շէն պահեր է,

Յսօր ծաղիկ ո՞վ ասէր,

Երբ նորա անունն Իսուս է,

Ողորմա՜ծ, ողորմա՜ծ, ողորմա՜ծ ես, թագաւոր,

Մի՛ անտես առներ դու զմեզ, Տէ՛ր:

 

Բ/ԽԸ. ՀԱՅԵՐԷՆ ԱՍԱՑ ՍՈՂՈՄՈՆ ԱՐՔԱՅՆ ՅԻՐՄԷՆ

Հեռի կացիր վատ մարդոյն,

Մի՛ մնար պահիկ մի մօտ ի յէն,

Առեր է ,,,, ն սատանին,

Հրաժարեր է հրեշտակն ի յիւրմէն,

Էրէկ … թիւն արեր է,

Հոտեր է մսիկն ի վրեն,

Մանկտի՛կ, էս աճէպն եկէք,

Ու տեսէք շապկիկն ի վրէն,

Առաջքն կրակէ հինած,

Թելըն ջուր, որ գործած է զէն,

Փողպատն ի քամուն է բացած

Կարելու դերձանն՝ ի ծովէն:

 

Բ/ԽԹ.

* * *

Գինին իւր բերնովն ասաց,

— Ես մահուկ եմ աստընորիս,

Կու ժողվին գոյնզգոյն մանկտիկ,

Կու կուտին ու կու գան առ իս,

Կու խմեն, կռիւ կանեն,

Կու դառնան պատճառ կանեն զիս:

 

* * *

Դուն գինին չափով խմէ,

Այն քեզ ընկեր մ' ալ աժէ,

Չափէն յաւելի խմես՝

Նա համլ բեր, որ ըզքեզ շալկէ,

Առնու ըզքեզ ի տուն տանի,

Ասես, թէ «Այս մեր տունըն չէ»,

Տղայքդ ի դէմդ ելնէն,

Ասեն, թէ՝ «Այս մեր հայրն չէ»:

 

* * *

Ես խիստ…