Ստորագրութիւն հին Հայաստանեայց

  Այսպէս գրի յերիս ձեռագիրս աշխարհագրութեան Խորենացւոյն, այլեւ առ Յովհաննու կաթուղիկոսի, եւ առ Թովմայի Արծրունւոյ, որպէս եւ յօրինակս ինչ Եղիշէի. նոյնպէս գրի ուրեք եւ ՚ի հին քերականութեան նախնեաց: Իսկ ՚ի տպագրեալն աշխարհագրութեան Խորեն. գրի Մարգաստան: Թովմա Արծրունի ՚ի յիշելն` գրեաթէ ամենայն ուրեք զանունս Գաւառ յարակցէ յայն, որպէս ՚ի գ. 13. *Եւ զՄարդաստան գաւառն` զբուն բաժին Գուրգինայ, դարձոյց առ նա Դերանիկն: ՚Ի բանից Յովհաննու կաթուղիկոսի երեւի լինել սահմանակից կամ մերձակայ Տոսպ գաւառի, զի գրէ. *Գայր հասանէր զկողմամբք Մարդաստանի եւ Տոսպ գաւառի:

Եպիսկոպոս գաւառիս յիշատակի առ Եղիշէի եւ առ Ղազարայ ՚ի ստորագրութիւնս հարց ժողովոյն Արտաշատու առ Վարդանամբք, Երեմիա եպիսկոպոս Մարդաստանի:

Իսկ ՚ի Թ. դարու փոխադրեցաւ յայս գաւառ աթոռ Մարդպետական եպիսկոպոսին ՚ի Նախճաւան քաղաքէ, որպէս յիշատակէ Թովմա Արծրունի` զորոյ զբանս դիցուք ՚ի ստորագրեալ աւանի:

Համբոյրազան: Գրէ զայսմանէ Թովմա Արծրունի դ. 7. *Գունդ մի հարուստ անցեալ մնացին ՚ի Համբոյրազան աւանի Մարդաստան գաւառի, ուր եպիսկոպոսական աթոռ մարդպետականին` յայնժամ փոխեալ դնէր ՚ի Նախճաւան քաղաքէ:

Վիտահոտ: Աւան` զորմէ գրէ Թովմա Արծրունի. *Գան հասանեն ՚ի Մարդաստան, յաւանն Վիտահոտ, հանեն ընդ սուր:

Ձոր հասկոյ: Յիշատակի առ Թովմայի Արծրունւոյ. *Եւ խոյս առեալ շրջէր զկողմամբքն Մարդաստանի, եւ Ձորոյն հասկոյ: