Տարեգիրք

Եւ ի թուին ՇԿԸ [568=1119] զօրաժողով արար ամիրայն Խազի, որդի Արդուխին տէրն Հալպայ ահագին բազմութեամբ, վասնզի որպէս նահապետ էր ի վերայ Թուրքին ազգաւն իւրով, եւ վասն այնորիկ ժողովեցան ի կոչ նորա, եւ հասանէր նոքօք յՈւռհա, եւ ընդ որ անցանէր գերէր եւ աւերէր, եւ անտի եկեալ ի Պզահն, եւ անդ բանակ արկանէր։ Իսկ Ռօճէլն յուսացեալ ի զօրութիւն անձին իւրոյ՝ ոչ ժողովեաց հեծեալս, եւ ոչ այլ ուստեք առեալ օգնութիւն, այլ էառ Ռ [1000] ձիաւոր Ֆռանգ եւ Շ [500] ձիաւոր Հայ եւ Ն [400] հետեւակ, եւ այլ խառնիճաղանճ իբրեւ բիւր մի, եւ դիմեցին առ միմեանս ի պատերազմ. եւ զօրացաւ Թուրքն եւ փակեաց զնո/96բ/սա ի մէջ եւ մաշեցին զամենեսեան ի սուր սուսերի, եւ սպանաւ Ռօճէլն, եւ աւերեցին զամենայն գաւառն քրիստոնէից սրով, հրով եւ գերութեամբ։ Եւ թագաւորն Երուսաղեմի Պաղտինն ժողովեաց զմնացեալ զօրսն քրիստոնէից, եւ գնաց ի վերայ Թուրքին, եւ պատերազմեալ ընդ միմեանս՝ Բ կողմանքն պարտեալ ի փախուստ դարձան, եւ այլազգեացն պակասեաց իբրեւ արս ԺՌ [10. 000]. ոչ միայն սրով, այլ եւ ի տօթոյն հերձան, զի ամառն էր ժամն։ Ի սոյն ամի մեռաւ թագաւորն Յունաց Ալեքսն, եւ թագաւորեաց որդի նորա Պեռպեռօժէնն, այր բարի եւ բարեբարու, եւ եբարձ զերկրորդ անգամ մկրտութիւնն զոր իր հայրն տայր առնել։ Ի սոյն ամի թագաւորն Երուսաղեմի Պաղտինն տայր զՈւռհա եւ զԹլպաշար ի ձեռս Ճօսլնին, եւ կացոյց զնա ախոյեան ընդդէմ անօրինացն։ Եւ դարձաւ Ճօսլինն ի գութ ի վերայ Ուռհայոյ։ Եւ էր Պաղտինն թագաւոր Երուսաղեմի եւ Անտիոքայ եւ ամենայն ծովեզերեայցն։