Տարեգիրք

Հեղինակ

Բաժին

Թեմա

Ի թուին Հայոց ՆԽ [440=991] մեռաւ տէր Խաչիկ, եւ ձեռնադրեաց զտէր Սարգիս ի տեղի իւր։ Ի սոյն ամի ելին Եգիպտոսէ ազգ Արաբացւոց, ի գաւառն Անտիոքայ, եւ արարին բազում աւեր։ Եւ զօրքն Յունաց ելին ընդ նոսա ի պատերազմ, եւ յաղթեալ ի նոցանէ եղեն փախստական. եւ Արաբացիքն կալեալ իշխանս ի նոցանէ տարան յԵգիպտոս։ Իսկ յետ Բ ամի, ելանէր տուկ մի ի Յունաց, բազում զօրօք յաշխարհն Հայոց, եւ սկսաւ կոտորել զհաւատացեալսն Քրիստոսի, որպէս զանօրէնս։ /6բ/ Եւ ելին ի վերայ նորա զօրքն Հայոց եւ մաշեցին զնոսա ի սուր, եւ մնացեալքն լի ամօթով դարձան յաշխարհն իւրեանց։ Եւ ի սոյն ամի, գայր յԵրկայնաձեռն, ամիրայն տաճկաց, բազում զօրօք, եւ անցեալ ընդ Եփրատ գետ գերեաց զաշխարհն Եդեսեայ, եւ զսահմանս Հայոց, եւ դարձաւ յաղթութեամբ յաշխարհն իւր։