Տարեգիրք

Ի թուին ՇԾԱ [551=1102] դարձաւ կոմսն ի Ֆրանգաց Գունթ Սանջիլն, եւ հեծելազօր քպատերազմի ընդ նմա ԺՌ [10000], եւ եկն ի Կոստանդինուպօլիս, եւ ետ զգեղարդն Քրիստոսի թագաւորին Յունաց Ալեքսին, եւ Ալեքսն ընկալաւ զնա սիրով եւ ետ նմա պարգեւս բազումս. բայց գործ անաստուածութեան գործեաց ընդ նմա, զի ետ առաջնորդս եւ հրամայեաց ընդ անջրդի վայրս տանել զնոսա, եւ զամենայն անցս /75բ/ նոցա այրել ետ, զի մի՛ ինչ գտանիցեն. եւ յայնպիսի մեծ նեղութիւն անկան, զի զերիվարս իւրեանց ուտէին՝ զի ոչ գտանէին շէն կամ մարդ ի ճանապարհն ընդ որ գնային. եւ այլ անօրէնութիւն գործեաց ընդ նմա Ալեքսն, զի ազդ արար սուլտանին գալ կոտորել զնոսա, եւ Խլիճասլանն ժողովեաց զօրս բազումս, եւ ետ ընդ նոսա պատերազմ եւ ի սպառ կոտորեաց զնոսա։ Եւ Գունթ Սանճիլն ԳՃ [300] ձիաւորով եղեւ փախստական եւ եկն յԱնտիոք։ Յայնժամ Տանկրի ըմբռնեաց զնա, եւ երկաթի կապանօք արգել զնա ի բանտի Սարվանդի քարն, եւ զկնի աւուրց ինչ պատրիարգն Անտիոքայ եւ ամենայն եկեղեցականքն աղաչեցին զՏանկրի եւ ազատեաց զնա։ Եւ գնաց Գունթ Սանճիլն ի վերայ Տրապօլսոյ եւ պաշարեաց զնա, եւ նստեալ անտ շինեաց քաղաք հակառակ նմա եւ նեղէր զնա յոյժ։ Ի սոյն ժամանակի գայր մեծ կոմս մի յաշ/76ա/խարհէն Ֆրանգաց, Պետեւին անուն, եւ Լ բիւր [300. 000] հեծեալ ընդ նմա, եւ եկեալ ի Կոստանդինուպօլիս, եւ մեծաւ հպարտութեամբ խօսէր ընդ թագաւորն Յունաց, եպարգոս կոչելով զնա եւ ոչ թագաւոր. եւ ամենայն տունն Յունաց ահաբեկ եղեն ի նմանէ։ Եւ յայնժամ ետուն նմա գանձս բազումս, եւ արար սէր ընդ նոսա եւ ոչ արար վնաս թագաւորին, եւ ոչ յաշխարհն նորա։ Բայց թագաւորն նոյնպէս արար ընդ Պետեւինն որպէս արար ընդ Սանճիլն. եհան ընդ անբնակ եւ ընդ անջրդի ճանապարհ, եւ ազդ արար Խլիճասլանին, եւ Խլիճասլանն ազդ արար Դանիշմանին, եւ ժողովեցան ի վերայ նոցա անթիւ բազմութեամբ եւ պատահեցան միմեանց ի դաշտն որ կոչի Օլասի, եւ արարին սաստիկ պատերազմ զմեծ ժամ աւուրն, եւ ծածկեցին արեամբ զերեսս դաշտին։ Եւ զօրքն Յունաց եւ զօրավարն իւրեանց փախեան. եւ Հռոմայեցիքն որպէս զոչխարս մոլորեալ դեգ/76բ/երէին յօտար աշխարհն, եւ յանխնայ կոտորեցին զնոսա անօրէնքն։ Եւ իբրեւ ետես Պետեւինն զբեկումն զօրաց իւրոց, դիմեաց եւ ել ի լեառն մի, եւ այլազգիքն պատեցին զստորոտ լերինն, եւ անդ էր տեսանել դառնութեան օր ի վերայ քրիստոնէից. եւ Պետեւինն լայր դառնապէս զկորուստ զօրաց իւրոց, եւ ապա յուսահատեալ փախստական անկարէր յԱնտիոք ԴՃ [400] ձիաւորով, եւ այլ ամենայն զօրքն ի սպառ կոտորեցան։ Եւ գնաց Պետեւինն յԵրուսաղէմ, եւ զկնի աւուրց ինչ դարձաւ յաշխարհն իւր, եւ երդուաւ միւսանգամ գալ ի վերայ Պարսից, եւ առնուլ վրէժխնդրութիւն ի թագաւորէն Յունաց Ալեքսէն։ Ի սոյն ամի շարժեցաւ ամիրայն Եգիպտոսի, Արաբացիք, եւ Նօպիք, եւ եկին ի վերայ Երուսաղեմի. եւ թագաւորն Երուսաղեմի Պաղտինն ել սակաւ զօրօք ընդդէմ նոցա ի պատերազմ. եւ այլազգիքն դարձուցին զնոսա ի փախուստ, եւ անկան յԵրուսաղէմ, եւ այլազգիքն անկան յԱսկալոն, եւ խրոխտալով գնային։