Տարեգիրք

Ի թուին ՉԻԱ [721=1272] յօր Մկրտութեան Տեառն, որ էր յունուարի ամսոյ Զ եղեւ ուրախութիւն ի /179ա/ մայրաքաղաքն Սիս, եւ ի նոյն աւուր եկն ձիւն առ հասարակ յաշխարհն Կիլիկոյ մինչեւ առ ափն ծովուն ովկիանոսի։ Ի սոյն ամի եւ ամսեան հանգեաւ ի Քրիստոս սուրբ վարդապետն Կիւրակոս, որում ողորմեսցի Տէր։ Ի սոյն ամի ի հարճից արքային Հեթմոյ Մարիա անուն, յԻսմայելացւոցն սեռէ, յարեալ ինքն զոմանս ի նոյն սեռէ, եւ եդեալ խորհուրդ ընդ նոսա զի մահացու դեղօք սպանցեն զարքայն Լեւոն, եւ մնային դիպող ժամու, եւ ի նախախնամութենէն Աստուծոյ ի ձեռն մետասանամեայ մանկան յայտնեցաւ չար գործն կնոջն, եւ ապրեցաւ արքայն. եւ ոչ արար արքայ նոցա չար ըստ արժանեաց իւրեանց, այլ խնամով։

Ի սոյն ամի թագաւորն Լեւոն հրամայեաց շինել ամրոց առ լերամբն Տաւրոսի, հանդէպ քաջայաղթ զօրավարին Անդրէի պահարանիցն, կիսօրեայ ճանապարհաւ հեռի, ի պահպանութիւն այնմ գաւառին եւ հռչա/179բ/կաւոր ճանապարհին Խոզ ձորոյ։ Որ եւ ի նոյն ամի յոր սկսաւ, կատարեաց զնա, եւ անուանեաց զնա Կատարեաց։ Ի սոյն ամի մկրտեցին զորդի արքային ի մայրաքաղաքն ի Սիս, եւ ընկալաւ զնա յաւազանէն հայրապետն Ասորոց Իգնատիոս, եւ անուանեցաւ Թորոս, ըստ հօրեղբօրն իւրոյ անուան, որ սպանաւ յԵգիպտացւոցն ի մարտ պատերազմին։ Ի սոյն ամի մի ոմն ի ծառայիցն Ըռէտուարտին, որ եկեալ էր յայսկոյս ծովուն եւ էր ի յԱքքա, յաւուր միում մտեալ առ թագաւորն զի նստեալ էր առանձին բարակ պատմուճանաւ, եւ հանեալ զամենեսեան արտաքս զսպասաւորսն, եւ ինքն մատուցեալ առ ունկն թագաւորին, որպէս թէ ծածուկ բան ինչ ունի ասել, եւ հանեալ զդանակն եհար ի վերայ կրծից արքային, եւ թագաւորն ընդոստեաւ եւ զձեռն աջոյ ընդդէմ սրոյն տարեալ, եւ նա կրկնեալ զսուրն եւ եհար…։