Տարեգիրք

Ի թուին ՇՀ [570=1121] Խազի ամիրայն յաշխարհէն Գանձակայ, որ էր սահմանակից աշխարհին Վրաց, առեալ զօրս մտանէր յաշխարհն Վրաց, եւ մասն մի գերի վարեալ տանէր։ Եւ Դաւիթ թագաւորն Վրաց գաղտաբար անկանէր ի վերայ եւ սատակէր զամենեսեան արս ԽՌ [40. 000] եւ զտուն եւ զորդիս եւ զամենայն ինչս նոցա տարաւ յաշխարհն իւր, եւ մնացեալքն գնացին առ սուլտանն Պարսից Մելէքն, որդի /97բ/ Տափարին, եւ պատմեցին նմա զչար անցս իւրեանց. եւ նա հրամայեաց լինել ժողով յամենայն տէրութիւնս իւր, եւ զԿարմիանն եւ զթագաւորն արաբացւոց որ կոչէր Սաղա, եւ ժողովեցան ՃԾՌ [150. 000] եւ մտին յաշխարհն Վրաց ի կողմն Տփխեաց։ Եւ թագաւորն Դաւիթ, որդի Դեկայ որդւոյ Բագարատայ, որդւոյ Գորգէ, կազմեալ գումարեաց զզօրս իւր եւ եբեր ի Խփչախաց ԽՌ [40. 000] հեծեալ, եւ յԱլանաց ԺԸՌ [18. 000], ի Ֆռանգաց ԵՃ [500], ի Հայոց ԺՌ [10. 000], արք քաջ եւ պատերազմողք, եւ այսու ամենայնիւ գնաց ընդդէմ նոցա եւ սկսան ի պատերազմ։ Եւ անդ էր տեսանել սոսկալի օր, եւ օգնութեամբն Աստուծոյ յաղթեցին քրիստոնեայքն, եւ սպանին Խ բիւր [400. 000] եւ բռնեցին ԾՌ [50. 000]. եւ սուլտանն Մելէք եւ Խազի մազապուրծ գնացին, եւ թագաւորն դարձաւ ուրախութեամբ։ Եւ ի սոյն ամի էառ զՏփխիս ի Պարսից պատերազմաւ, եւ արար սաստիկ կոտորածս եւ ԵՃ [500] սրահանգ կախեաց զփայտէ։