Տարեգիրք

Հեղինակ

Բաժին

Թեմա

Իսկ ի թուին ՈԽ [640=1191] եկն թագաւորն Ֆռանգաց նաւովք յԱքքա բազում զօրօք եւ պաշարեաց զնա, եւ եկն Սալահատինն, քանզի նորա էր քաղաքն, եւ բանակեցաւ ընդդէմ նոցա. եւ զօրքն Ֆռանգաց փորեցին շուրջ ինքեանց Գ խանդակս եւ ամրացան յոյժ, եւ ցանեցին շուրջանակի տատասկ երկաթիս, եւ ի մեծ վտանգի ունէին զքաղաքն, եւ սուլտանն ոչ կարէր օգնել քաղաքացեացն։ Եւ յայնժամ եկն թագաւորն Ընկլիզաց ի Կիպրոս, եւ էառ զնա ի Յունաց, եւ կալեալ զտուկն Կօմանէ եւ եբեր ի յԱքքա, եւ միաբանեալ Բ /135բ/ թագաւորքն պատերազմէին ընդ սուլտանն եւ ընդ քաղաքացիքն քաջապէս։ Եւ յայնժամ առաքեաց սուլտանն առ թագաւորքն եւ ասէ. առէք զքաղաքդ ձեր ի ձեզ, եւ զմարդիկդ վաճառեցէք կշռով անձանց իւրեանց ոսկւոյ եւ արծաթոյ. նոքա պատասխանի ետուն եւ ասեն. վասն պատուոյ երեսաց քոց պարտ էր մեզ առնել զայդ, բայց զի երդուեալ եմք յառաջագոյն ի սուրբ գերեզմանն Քրիստոսի՝ ի բերան սրոյ մաշել զամենեսեան, եւ վասն այնր ոչ կարեմք լինել երդմնազանցք. եւ առին զքաղաքն եւ սպանին անդ ԼԶՌ [36. 000] այր, եւ Սալահատինն փախեաւ։