Տարեգիրք

Ի թուին ՈԽԱ [641=1192] եղեւ սով սաստիկ, զոր ոչ ոք կարէ տալ գրով զօրինակն այնպիսի դառնութեան, զի ի բազում մեռանելոյն ոչ կարէին թաղել զմեռեալսն, եւ երանէին յառաջագոյն վախճանելոցն։ Եւ յորժամ հասին ի ժամանակ գարնայնո/136ա/յն, արածէին ի վերայ խոտոցն իբրեւ զոչխարս, եւ յանընդել կերակրոցն անկեալ մեռանէին։ Ի սոյն ամի մեռաւ Խլիճ Ասլան սուլտանն յԻկոնիոյ. իսկ Սալահատինն սկսաւ նեղել զմեծն Անտիոք զի առցէ. եւ ասացին նմա աստեղագէտքն եթէ ոչ կարես տիրել նմա, եւ դադարեաց սուլտանն ի նոյն խորհրդոյ։ Եւ Անտիոք նեղէր ի սովոյ, զի ոչ մտանէր անտ կերակուր յահէ սուլտանին, եւ ասեն արք քաղաքին ընդ բրինծն. ահաւասիկ մեռանիմք ի սովոյ, զի՞նչ արասցուք. եւ ասէ բրինծն. համբերեցէք ինձ ԺԵ օր եւ տաց ձեզ պատասխանի։ Եւ յարուցեալ բրինծն առնու ընդ իւր ձիաւորս Ե եւ գնաց առ Սալահատինն մինչդեռ բանակեալ կայր հանդէպ քաղաքին Աքքայոյ, եհաս ի դուռն խորանին, եւ ասէ ընդ դռնապանսն. ասացէք սուլտանին թէ բրինծն Անտիոքու աստ է, եւ խնդրէ տե/136բ/սանել զքեզ. զոր իբրեւ լուաւ սուլտանն, վաղվաղակի ել ընդ առաջ նորա, եւ կալեալ զձեռանէ նորա եմոյծ ի խորանն, եւ մեծարեաց նստիլ։ Եւ նա ասէ. խնդիրս ունիմ առ քեզ, եթէ կատարեսցես՝ նստայց. եւ ասէ՝ կատարեալ է զոր խնդրես, ասա. եւ ասէ բրինծն. խնդրեմ ի քէն պարգեւել ինձ զԱնտիոք։ Եւ ասէ սուլտանն՝ պարգեւեալ է, եւ ի վերայ այդորիկ Գ ամաց կերակուր քեզ եւ քաղաքին քո ես տաց։ Եւ արար սէր կատարեալ եւ դարձաւ յԱնտիոք, եւ լցաւ քաղաքն առատութեամբ եւ կերակրօք։