Տարեգիրք

Ի թուին ՉԵ [705=1256] յամսեանն սեպտեմբերի, եկն արքայն Հայոց Հեթում յանուանեալ խանէն Մանգոյէ, եւ ընդ որ ի գնալն գաղտագողի անցանէր, ի դառնալն ընդ նոյնն իբրեւ զառեւծ գայր ընդ մէջ նոցա։ Եւ եկեալ եհաս խաղաղութեամբ մինչեւ ի դղեակն որ կոչի Բարձր, ուր էր հայրն իւր Կոստանդին, եւ ուստերք եւ դստերք իւր, եւ ուրախացան յոյժ։ Եւ ապա ի սոյն ամի, յամսեանն հոկտեմբերի, աշխարհաժողով արարեալ թագաւորն Հեթում, հանդերձ հարազատօք իւրովք եւ համօրէն ազգայնօք եւ ազատօք, որ եւ ասէին թէ ժողովեցան իբրեւ բիւրս Ժ [100. 000] եւ արշաւեաց նոքօք ի գաւառն Հոռոմոց, առ ստորոտով լերինն Տաւրոսի, մերձ ի քաղաքն Առակլի, ի փողն Եկեղեցեաց, եւ ի Մուրանդին, եւ անդ շահեցան բազում արջա/159ա/ռս եւ ոչխարս, ձիս եւ ջորիս, ծառայս եւ ոսկիս, եւ բազում աւարաւ դարձաւ յաշխարհն իւր, եւ ուրախացան ոչ սակաւ աւուրս։ Ի սոյն ամի կամեցաւ թագաւորն Հեթում ձիաւորեցուցանել զանդրանիկ որդին իւր Լեւոն։ Եւ եկն ի մայրաքաղաքն Մսիս եւ առաքեաց յԱնտիոք եւ կոչեաց զփեսայն իւր զՊեմունտ բրինծն Անտիոքայ եւ կոմսն Տրապօլսոյ գալ առ ինքն հանդերձ կենակցաւն իւրով։ Եւ նոյն օրինակաւ յղեաց եւ առ Ճուլիան տէրն Սայիտոյ գալ հանդերձ կենակցաւն իւրով. նա եւ զգունթէս Ճաֆուն, եւ զամենայն բարեկամս իւր մեծարեաց գալ յայսկոյս։ Որ եւ ի վանօրէից զամենայն դասս եկեղեցականացն ժողովեաց յառաջիկայ ուրախութեան գործն։ Եւ ձիաւորեցուցին զնա ի թուականին ՉԵ [705=1256] յամսեանն նոյեմբերի ԺԵ օրն, եւ ուրախացաւ թագաւորն ուրախութիւն մեծ հանդերձ հարբն իւրով եւ ամենայն զարմիւքն եւ ժողովովն որ եկեալ էին։