Տարեգիրք

Ի թուին ՇԿԴ [564=1115] եղեւ սոսկալի նշան ի քաղաքն Ամիթ, զի հուր էջ ի վերայ ճեմեղ/93բ/ին իւրեանց, եւ այրէր զքարն որպէս փայտ, եւ ամենայն քաղաքն գնացին անցուցանել եւ ոչ կարացին, զի ոչ ունէր բնութիւն զգալի հրոյ։ Ի սոյն ամի եկն Բրզուխն եւ էառ զՇիզայրն, եւ կամէր աւերել զգաւառն Անտիոքայ. եւ ժողովեցան ամենայն ազգն Ֆռանգաց առ կոմսն Անտիոքայ Ռօճէլն, թագաւորն Երուսաղեմի Պաղտինն, եւ միաբանեցան եւ Մսլմանքն Խազի որդի Արդուխին, եւ Տուշտիկին տէրն Դամասկոսի, եւ ամիրայն Հալպայ, եկին առ քրիստոնէքն, եւ միաբանեցան ընդ նոսա եւ գնացեալ բանակեցան ընդդէմ միմեանց. եւ ոչ իշխեաց Բրզուխն պատերազմել, այլ դարձան իւրաքանչիւր ի տուն իւր. եւ Պաղտինն եկն յԱնտիոք զհետ Ռօճէլին։ Իբրեւ ետես Բրզուխն թէ ցրուեցան, դարձաւ ի վերայ եւ կամէր աւերել զաշխարհն Անտիոքայ. եւ լուեալ զայս Պաղտինն՝ առնու զզօրսն Անտիոքու ԸՌ [8000] ձիաւոր, եւ ի գիշերի գնաց ի վերայ Բրզուխին, եւ եգիտ զնա անպատրաստ, եւ սուր ի վերայ եդեալ կո/94ա/տորեաց ի նոցանէ արս ԾՌ [50. 000]. եւ վարեցին զմնացեալսն ի փախուստ, եւ կալան ամիրայս Ձ [80] եւ առին անթիւ ինչս, եւ ձիս եւ ջորիս։