Պատմութիւն Հայոց

ԳԼՈՒԽ ԼԹ
(Դարձեալ) Թուղթ Աբգարու:

Գրէ եւ առ Արտաշէս արքայն Պարսից վասն Յիսուսի:

Աբգար արքայ Հայոց` Արտաշիսի եղբօր մերում`արքայից արքայի` խնդալ:

Գիտեմ` զի լուեալ է քո վասն Յիսուսի Քրիստոսի որդւոյն Աստուծոյ. զոր խաչեցին Հրէայքն. որ յարեաւ ի մեռելոց, եւ առաքէ զաշակերտսն իւր ընդ ամենայն տիեզերս, քարոզել եւ ուսուցանել զԲանն կենաց: Որ եւ մի յաշակերտաց նորա գլխաւորաց մի ոմն անուն Սիմօն. որ եկեալ ի կողմանս քոյոյ աշխարհիդ. արդ խնդիր արարեալ գտցես զնա. եւ նա բժշկեսցէ զամենայն ախտս հիւանդութեանց` որ ի ձեզ, եւ ճանապարհ կենաց ցուցցէ. եւ հաւատայցես բանի նորա` դու (եւ) եղբարք քո` եւ ամենայն որ հնազանդին քեզ կամաւոր. զիախորժելի է ինձ զձեզ ըստ մարմնոյ ազգականս իմ`լինել եւ ինձ մտերիմ ձեզ հարազատ եւ ըստ հոգւոյ հաւասար միմեանց. ողջ լե'ր:

Եւ այսպէս երանելի թագաւորն Աբգար ի ձեռն հրովարտակացն քարոզ լինէր Քրիստոսի յարեւելս եւ յարեւմուտս, առ կայսր եւ առ արքայն. եւ մինչդեռ պատասխանի չէր ընկալեալ այսմ թղթոյ, վախճանի`թագաւորեալ ամս երեսուն:

Կայսերք:

Թագաւորէ Գայիոս երկրորդ, որ է ի թուոյ չորս թագաւորացն Յունաց, ամս երեք եւ ամիսս չորս: Ի սորայ առաջնում ամի Մարկոս Աւետարանիչն յԱղէքսանդրիա եւ յԵգիպտոս քարոզեաց զԱւետարանն. եւ եկեաց ամս քսան եւ երկու. եւ մարտիրոսացաւ ի Բոկողոսորիսաց: Եւ յետ նորա նստաւ Աղէքսանդր Ա Եպիսկոպոս Անտիանոս... ամս քսան:

Կղօդէոս թագաւորէ, որ է հինգերորդ ի կարգի կայսերացն Հռովմայեցւոց, ամս տասն եւ երեք եւ ամիսսինն: Առ սովաւ եղեւ սովն համաշխարհական. եւ ընդ նոյն ժամանակս եղբայր Արքեղոսի սպան զՅակովբոս զեղբայրն Յօհաննու` սրով, ա'յն որ յառաջագոյն գլխատեաց զՅովհաննէս Մկրտիչ: Եւ ի նոյն ժամանակս Պետրոս առաքեալ զԱնտիոքացւոց զեկեղեցին հաստատեաց. եւ գնացեալ ի Հռովմ` քարոզեաց զաւետարանն. եւ կացեալ անդ առաջնորդ եկեղեցւոյն ամս քսան: Ընդ այն ժամանակս եկեալ յԵրուսաղէմ Պատրոնիկէ` կին Կղօդիայ կայսեր, կին բարեպաշտօն եւ երկիւղած ի Տեառնէ, եւ առեալ ի Հրէիցն իշխանութեամբն իւրով զխաչն տէրունական` աւանդեաց Յակովբու եղբօր Տեառն. եւ ինքն ընկալեալ զբշժկութիւն դստերն նորա` դարձաւ ի Հռոմ ուրախութեամբ: