Պատմութիւն Հայոց

ԳԼՈՒԽ ԾԲ
Խօսք եւ խոստմունք Արտաշրի Պարսից արքայի առ զօրս իւր:

Յետ այսքան աւերման եւ հալածանաց կոչէ Արտաշիր առինքն զամենայն նախարարս իւր եւ զգլխաւորս, եւ խօսի ընդ նոսա վասն ամենայն իրացն եղելոց. եւ խոստանայ բազում պարգեւս տալ` թէ ոք զերծուսցէ զնա ի հալածանացն Խոսրովու` կամ հնարիւք դեղոց եւ կամ գաղտնի խողխողմամբ սրոյ: Իսկ Անակ` որ էր մի ի գլխաւորաց նախարարացն` անցեալ ի մէջ` խոստանայ առնել զկամս արքային: Եւ ելեալ հանդերձ կնաւ իւրով եւ ընտանեօք հատուածի պատճառանօք եւ կեղծաւորութեամբ: Գայ հասանէ ի սահմանս Ատրպատականի ընդ մէջ Կորդուաց, եւ դադարէ ի գաւառնԱրտազու: Զոր ապա լուեալ Խոսրովու` ուրախ եղեւ. եւ առաքէ ընդ առաջ նորա զօրս: Եւ երթեալ հանդիպի նա առ հանգստարանի սրբոյ առաքելոյն Թադէոսի. զոր անդ` ասէ պատմագիրն` զյղութիւն մօր սրբոյն Գրիգորի, նաեւ զառաքելութեան ընկալեալ զշնորհս, եւ ի կեանս իւր կրեալ զպակասութիւն չարչարանացն նորա` որպէս ուսուցանէ քեզ պատմագիրն: