Պատմութիւն Հայոց

ԳԼՈՒԽ ԼԲ
Առաքումն իշխանացն Աբգարու առ Մառինոս, յորում տեսին զՓրկիչն մեր, ուստի սկիզբն հաւատոցն Աբգարու:

Ընդ այն ժամանակս եկաց ի գործ հազարապետութեան կայսեր ի վերայ Փիւնիկեցւոց` եւ Պաղեստինացւոց` եւ Ասորոց` եւ Միջագետաց` Մառին` որդի Գոտորգեայ. առ որ առաքեաց Աբգարոս երկուս ի գլխաւորաց իւրոց`զՄարիհաբ Բդեշխ Աղձնեաց եւ զՇամշագրատ նահապետ Ապահունեաց եւ զԵնան հաւատարիմ իւր` ի քաղաքն Բէթքուրբեն` զգացուցանելով նմա զպատճառ երթալոյն իւրոյ յարեւելս: Իսկ նոքա դարձեալ անտի`եկին յԵրուսաղէմ. տեսեալ զՓրկիչն մեր Քրիստոս` եւ ականատես եղեալ` պատմեցին Աբգարու: Եւ նորա զարմացեալ` հաւատաց ճշմարտութեամբ. եւ ասէ, ա'յն զօրութիւն ո'չ է մարդոյ, այլ Աստուծոյ. զի ո'չ կարէ մարդ յարուցանել զմեռեալ, այլ Աստուած: Եւ քանզի ինքն վշտացեալ էր մարմնով չարաչար ցաւոց, գրէ թուղթ առ Փրկիչն` գալ բժշկել զնա ի ցաւոցն. օրինակ զայս: