1877-1878

993.

* Գերպ. Իգնատիոս Կիւրեղեան Աբբահօր - Փլորենտիա՞

Ս. Ղազար - Վենետիկ, [անթուակիր] 1877-8

Արհիապատիւ Տէր եւ Աբբահայր,

Զարմանայաք եւ մեք ընդ յամել թղթոյ Վեհիդ, եւ որպէս հաւանէաք՝ նոյնպէս գիտացաք արդ նմին պատճառս զմնալդ աւուրս ինչ ի Փլորենտիա. ուր եւ, շնորհակալ եմ, զի աշխատութիւն յանձն առեալ ելեալ էք ի խնդիր մատենկանն եւ հեղինակին. լիցի նա թերեւս առթիւս՝ ծանօթ եւ բարեկամ Ուխտիս։

Յերիկեան ծրարի թղթոց Կ. Պօլսի գտի զայսոսիկ, եւ որպէս գտի այնպէս առաքեմ. չկայր այլ թուղթ վասն վանականացս, բայց տպագրեալ ցուցակ մի հարցաքննութեան ուսմանց աշակերտաց Քաղկեդոնեան վարժարանի։

Աւուրբք յառաջ եկեալ է ի վանս դուստր քեռւոյ Վ[երապատուեալ] Հ[օր] Ռափայէլի, եւ հարցեալ զնմանէ, ծանուցեալ եւս, զի մայր նորա չքաւորութեամբ տառապի եւ ի տունս ազգականացն պատսպարի։

Արիստիդեայ պատառիկքն տպագրին. այլ կարեւոր է գիտել թէ մա՞րթ իցէ ընծայել զայն Ս. Քահանայապետին [1] ՝ թէ ոչ, զի ըստ այնմ յարմարեսցի յառաջաբանն եւ խորագիր. եւ խնդրի փութով տեղեկանալ այդր ի պաշտօնականաց եւ ծանուցանել։

Բարւոք կան մերայինք, եւ ես ի նոյն ջանամ կրթել ջերմախառն հարբղխիւ, մատուցեալ ի համբոյր օրհնաբաշխ աջոյ

Արհիապատիւ Տէրութեանդ

ն[ուաստ] ծ[առայ]
Հ[այր] Ղեւոնդ Մ[արգար] Ալիշան
Ո[րդեգիր] Կ[ուսին]