Պատմագրութիւն

Յորժամ առին Ղարսեցիք զՄաղասաբերդ, առաքեցին զաւետիս արքային իւրեանց Սուլթան Մուրատին: Եւ հրամայեաց թագաւորն, զի տայցեն բերդն առողի նորին` որդւոց յորդիս. եւ է այնպէս. եւ կոչի Խաթուն-օղլի: Եւ ինքն Սուլթան Մուրատ առեալ զզօրս իւր աւելի քան զՉՌ, եւ գնաց ՚ի վերայ Բաղդատայ: Եւ առաքէ Շ Թաթար ՚ի Քաֆայոյ յԱրզրում առ Քանան փաշայն, եւ պատուէր ետ նմա ժողովեալ զմերձակայ փաշայքն զօրօք, եւ գնալ ՚ի կողմն Պարսից` առնել աւար եւ գերութիւն: Եւ նա ժողովեաց զամենայն` որպէս եւ էառ հրաման, զփաշայն Կողոնիոյ` որ է Շապղարասար, զփաշայն Դարունոյ` որ է Հասան-ղալայ, զփաշայն Կարուց, զՍաֆար փաշայն Ախլցխոյ, եւ ժողովեցան աւելի քան զԽ. եւ եկին ՚ի վերայ երկրին Արարատայ, եւ հասին մինչ ՚ի գաւառն Կոտէից. գերեցին եւ աւար առին զոր ինչ գտին: Եւ խանն Երեւանայ լուեալ զայս` ժողովեաց զզօրս իւր յոյժ սակաւ, եւ ելեալ յառապարն հանդէպ Քանաքեռոյ` անկոխ տեղեաւ գնաց ՚ի վերայ զօրացն Իսմայելացւոց. եւ գնացեալ մինչ ՚ի գետ րոն եւ անցին զՀուրաստան գետ, որ ասի Զանկի. եւ երիվարք նոցա պասքեալք էին ՚ի ծարաւոյ, արբին ջուր եւ ծանրացան. եւ գնացին մինչ ՚ի վեր աւերակ գեղջն` որ կոչի Պտղունս, եւ հարան ընդ միմեանս: Եւ գոչեցին Իսմայելացիքն քաջաձայն աղաղակաւ` եւ անկան ՚ի վերայ Պարսիցն, եւ ոմանք զհետ եղեն խանին` եւ հարին զնա լախտիւ` որ է թօփուզ. եւ փախեաւ խանն եւ ամենայն զօրք իւր: Եւ ՚ի փախչիլն խանին` վաստակեցաւ ձին եւ մնաց, եւ ոչ կարէր գնալ. ոմն Պարսիկ Բխուղաթ-բէկ անուն` էջ ՚ի ձիոյն, եւ նստոյց զխանն ՚ի ձի իւր, եւ փախոյց. եւ ինքն կալեալ զերասանակ ձիոյ խանին` եւ քարշեալ ՚ի տեղի ինչ` թաքեալ զերծաւ: Իսկ խանն միով շաթրաւ մազապուրծ եղեալ անկաւ ՚ի բերդն: Եւ Հագարացիքն հալածեցին զԿարմրագլուխսն, զոմանս սպանին, զոմանս գերեցին, եւ զոմանս կիսամեռ արարին. եւ ինքեանք սփռեցան զերկրաւն անահ եւ աներկիւղ: