Թղթեր

Մի' ոք զմեզ աղարտել նախատանս կասկածել վարկցի կարկատել ի վերայ մեր սակս նորագոյն լսել մեզ կամ ասել ինչ, քան զ՚ի ճեմարանին Սոկրատային այսոքիկ սովորութիւնք եւ կրթութիւնք մանկանցն հռետորական:

Ասեն զՊռոկլէս ոմն Պոմպիոսեան, քանզի այս երրորդ եղբայր նորա մարտուցեալ ընդ Աւդիսեայ սպասէր նմա որպէս Պարէս Դիմիդեայ. զի գաղտնի մահու օրհաս հասուսցէ նմա. եւ այսպէս միշտ ախտանայր առ նա եւ իբրու պատշաճ ժամանակի գտտնէր զնա միայն ի գիշերի: Աղդ ի ծառայէ իւրմէ լինէր Պռոկլեայ իբրու թէ Աւդէս ննջէ միայն մերձ առ վիմովն Մաւդիկայ: Ոչ եղեւ հնար զարթուցանել զՊռոկլէս, քանզի նախագուշական լեալ այս Եռակլեայ եւ բողոքեալ ի Դիոնիսեայ, զի ծանրացուսցէ զՊռոկլէս: Եւ յարուցեալ Պռոկլէս, ուխտ եդեալ առ դիսն` ոչ երբէք ննջել եւ ոչ ի Դիոնիսեայ առնուլ ճաշակ: Եւ յայսմանէ կրէր զկարեացն կիրս ոչ սակաւ: Եւ քանզի տառապէր, հնար հաւանէր խնդրել, եւ ուսեալ ի Կլէանթեայ ակն գայլոյ ճաշակել եւ զնոյնն ի վերայ ճակատին կառուցանել ի ձեռն ծաղկահոտ մոմոյ, զի մի' երբէք ննջեսցէ: Եւ խնդրեալ զայս Պռոկլէս ի Տիւռռենացի ատնէ, որ էր յոյժ քաջաղեղն յորսս. իսկ նորա ջան եդեալ, զի հարցէ գայլ սակս խնդրոյն Պռոկլեայ: Եւ ծանուցեալ Աւդիսեայ, աղաչեալ զաղեղնաւորն եւ հաւանեցուցեալ ի ձեռն արծաթոյ, զի փոխանակ ակին գայլոյ ակն արջոյ տացի նմա: Եւ յարմարեալ ընդ այն եւս ակն խիժ պտոյ որթ զորակնէ, տայր Պռոկլեայ: Իսկ նորա զիղձ փափագման տենչանացն ի ձեռն առեալ, հրճուէր անպայման եւ իբրու ճաշակեալ թմբրէր ընդարմացեալ, երկակի հակառակացն հանդիպեալ, որով հակամիտէր. եւ այս բազմաժամանակեայ եհաս նմա պատահումն:

Իսկ ոմն մերձ առ Դաբաւանդն կոչեցեալ լեառն, Ռոստոմն կոչեցեալ Սաճիկ, երիվար նմա ունել ասի Ռաշ այսինքն աշխէն. եւ զի քնոյ էր Ռոստոմն այն, սպասէր նմա մահու Դիւղեղն. եւ զի ոչ երբէք ննջէր Դիւղեղն այն, զգուշութիւն եղեալ Ռոստոմեայ, զոր նայն խոկայր. իսկ Ռոստոմն բողոքեալ երիվարին Ռաշին զգուշանալ. եւ նա միշտ ոչ ննջէր. եւ ի միում գիշերի հասանէ ի վերայ նորա Դիւղեղն. զտանէ զնա արբեալ. եւ իմացեալ զայս Ռաշին, դաբր հատեալ վրնջէր, մինչ զարթուցանէր զՌոստոմ, եւ այսպէս ապրեցուցանէր: Եւ երբեմն ննջեալ քնուն Ռոստոմ ի վերայ հասեալ պատահմամբ Սպանդիարն անուանեալ, սպառնայր զԴաբաւանդ ի վերայ նորա հոլովել: Զոր զարթուցեալ ռստագէսն այն սոթահերն այսինքն շարժեալ զվարսն իբրու երբեմն Կռօնոս յակնարկելն զՈղոմպիոս եւ ի ծայրս կօշկին արտակիտեալ ի վերջ նահանջէր:

Այս յաղագս քնոյ քեզ սակաւուք իմաստասիրեալ: