Թղթեր

Վարժողական ներտրամադրութիւն մակամտածական բաղդատութեամբ երկպատիկ ի քէն հայցէ բանս իրաւացի ինձ վարկանիլ, մանո'ւկ դու, նախ ելոյ եւ ապա բարւոք ելոյ:

Արժանապէս բաղկացուցանօղ եւ արծարծօղ եւ մակացու ենթակայի յարհեստ պիտանացու տածեալ վեհագոյնն խոկման ի բարիսն մոլորեցուցիչ եւ ի վատթարագունէն քեցեալ տռփմանէ:

Հպատակ եղեալ ի հուսկիցն կարծեաց, եւ յանուսումնութենէ արիական ջանիւ նահանջեալ, եւ յատտիկեցի կրթմունսն, մինչ տակաւին յանտիական տիս հասեալ, ի տէրունեան ճեմարանին զարգանաս:

Րակերտեալ րաբունական եռանձնեան կոչմանն եւ հայրենի աւանդութեանն պատահեալ բախտի հուպ քեզ յենթակայէ եղեալ բոլորն եւ ի կատարմանէ:

Առասանութիւնս Պիւթագորեան եւ Պղատոնական եւ Ստագիրացւոյն իբրու զստինս դիեցեալ, մինչ ի տարերս տակաւին տարբերէիր, տենչացեալ ըղձայի քեզ արբուցանել անդանդաղ:

Մեծագոյն ձիր քան զոսկի եւ քան զականս եւ զբոլոր բաղկացեալ նիւթ զդա կապտեալ յոքնական առաքինութեամբ, ի մի հաւաքեալ, ընձեռեցի քեզ աննախանձ, եւ անդուլ ոչ հանգեայ երբէք. եւ փոխարէնս հայցեմ ի քէն զաւանդութիւնն մեր ոչ մոռանալ երբէք եւ զփոյթ սիրոյն առ Քրիստոս Աստուած մեր եւ զլոյս ճրագի նախնւոյն մերոյ ոչ շիջուցանել զՊարթեւին ասեմ քոյոյ հաւուն: